UNgizwe uyaveva ngesenzo sabaculi
OWAYENGUMSAKAZI woKhozi FM, uNgizwe "Zulu Charmer" Mchunu, uthukuthele uyaveva emuva kokuba abaculi begqom' abasafufusa uMkhululi
“Bhande Leshunik” Majola noNkululeko "King Dudula" Majola, besebenzise izwi lakhe kungavunyelwene naye.
Laba baculi bacaphune inkulumo kaNgizwe bayifaka engomeni yabo esihloko sithi #Khulul'Ubaba. Kule ngoma abaculi banxusa uMengameli wezwe uCyril Ramaphosa ukuba akhulule owayengumengameli wezwe, uJacob Zuma futhi baze basho isiqubulo esesidunyiswe wuNgizwe esithi "Ay'khale“.
Ethintwa uNgizwe uvele wathi akabazi laba baculi futhi akukho ake avumelana nakho nabo.
"Mina angidlali njengamanje. Angidansi, ngisempini," kusho uNgizwe okhonjwa emdlalweni osakazwa ku-SABC 1, Uzalo.
Akaphumelanga obala ngokuthi zikhona yini izinyathelo zomthetho azozithatha.Nakuba kunjalo kodwa uthe ngeke avimbele abantu abafuna ukudlulisa ukungenami kwabo ngokuboshwa kukaZuma ogqunywe ejele elise-Estcourt.
Kubuzwa uKing Dudula ukuthi bayiqophe noNgizwe yini le ngoma njengoba kuzwakala izwi lakhe, uthe bavele bacaphuna ezinye zezinkulumo zakhe maqede bazifaka engomeni.
"Sizame kaningi ukumthinta ocingweni lwakhe. Ubelubamba kodwa athi asibuye simthinte umatasa. Sikwenze lokho izikhathi zilandelana impela kodwa sagcina singamtholanga ukuba sikhulume," kuphendula uKing Dudula (33) waseNgwelezane, eMpangeni.
UBhande Leshunik uthe balicaphunile izwi likaNgizwe ngoba lingusandanezwe kulezi zinsuku.
“Inhloso yethu bekuwukuqinisa umyelezo wokuthi akukhululwe ubaba njengabantu abakhathazekile ngokubona umuntu omdala oneminyaka engu-79 egqunywa ejele. Asingene kwipolitiki. Sabesesibona uMacingwane ephusha lo mkhankaso safuna ukuxhumana naye,” kusho uBhande Leshunik (35) waseDukuduku, eMtubatuba.
Uthe bona kabagqugquzeli udlame nezibhelu esezikhiphe imiphefumulo engaphezu kuka-212 kuleli. Kwenzeka lokhu nje uNgizwe, owazakhela udumo ngohlelo Sigiya Ngengoma oKhozini, nakwiRoots kuSABC 1, ngoLwesihlanu umemezele ukuthi uzozinikela emaphoyiseni namhlanje ngoba usekhathele ukuhamba ethuka izanya njengenyamazane ngenxa yokubalekela amaphoyisa.
"Ngizobe ngihamba nommeli wami nezinye izinsizwa. Ngifuna ukubuza uKhomishani wamaPhoyisa waKwaZulu-Natal ukuthi yiqiniso yini ukuthi ngiyafunakala nokuthi uma ngifunakala, ngifunelwani," kusho uNgizwe ngesikhathi ekhuluma kwikhasi lakhe leFacebook iNgizwe Online.
Uthe usesabela impilo yakhe ngoba kunabantu abafuna ukumbulala.