Kuhlwe emini amaphoyisa eshaqa impahla ebitatshiwe
KUHLWE emini emphakathini owakhelene nesiteshi samaphoyisa esiseMountain Rise, eMgungundlovu, ngenkathi kutheleka amaphoyisa elanda izimpahla okusolwa ukuthi zithathwe ezitolo ngesikhathi kunemibhikisho kuleli.
Isolezwe lithole ukuthi kulandwe amafriji, amakhabethe, imibhede nokudla okusolwa ukuthi kutatshwe ezitolo eziseMgungundlovu. Phakathi kwamalokishi okushaqwe kuwo impahla kube yi-Eastwood, Panorama, Northdale, Swapho naseJika Joe.
Isolezwe libike ngokushiswa kwenxanxathela yezitolo iBrookside, eseMgungundlovu, lapho kutatshwe izimpahla kanti ezinye izimpahla zithathwe edolobheni ngesikhathi kucekelwa phansi izitolo.
Umthombo weSolezwe ocele ukungadalulwa uthe, amaphoyisa agasele kule mizi athatha izimpahla.
“Abantu abebenamafriji, amakhabethe, imibhede, inqwaba yokudla kodwa bengenazo iziliphu ezikhomba ukuthi bakuthenge kuphi, bekuthathwa, abanye baboshiwe. Amaphoyisa agasele ekuseni elokhu eziqoqile lezi zimpahla,” kusho umthombo.
Emakhasini amaphoyisa eleFacebook neleTwitter, kuvezwe amaphoyisa aseMountain Rise, ethatha inqwaba yezimpahla ayigcina endaweni yokupaka izimoto.
Ezithombeni bekubhalwe ukuthi; Amaphoyisa angaphansi kwesifunda uMgugundlovu, eMountain Rise, ashaqe inqwaba yezimpahla, kubonakala nomphathi wesiteshi uBrigadier Pillay, ematasa eqoqa izimpahla ezintshontshiwe.
Iphephandaba lithole ukuthi ngesikhathi kugasela amaphoyisa abanye abantu babalekile, abanye baboshwa, abanye bebethi kabazazi kanti amaphoyisa athole ezinye sezibekwe esigangeni.
Umkhankaso wokushaqa impahla etatshiwe ezitolo uqalwe nguNgqongqoshe wamaPhoyisa uBheki Cele, othe abangenawo amarisidi aqinisekisa ukuthi bayithengile impahla, bazoboshwa nempahla ithathwe.
Ezinkundleni zokuxhumana kubonakale izimpahla zilandwe kwezinye izindawo eKZN eGauteng. Abakhulumela amaphoyisa bathe kabaphawuli kwizigameko ngazinye, bazothumela isitatimende.