Makungagxilwa kwezomnotho uma kukhucululwa iNingizimu Afrika
UKUVUMA kukaMengameli Cyril Ramaphosa ukuthi kukhona uhulumeni obungakwenza, ukuvimba izibhelu eziqubuke KwaZulu-Natal naseGauteng, yisinyathelo sokuqala sokulungisa isimo.
Phambilini umengameli wenze iphutha ngokuthi esikhundleni sokukhuza abantu baseNingizimu ngale nhlekelele, yena wayikhomba esizweni esithize.
Sibonile ukuthi leli phutha licasula abaningi futhi libhebhezela isimo sokucwasana nokubukelana phansi emphakathini waseNingizimu Afrika.
Ubuholi obuqotho ngobokuthi uvume nxa wenze iphutha bese uqhamuka nezinhlelo ezifanele zokulungisa leso simo.
Yilokho esikulindele njengamanje kuRamaphosa, amaqhinga okukhuculula nokuthuthukisa izwe.
Ngokuthuthukisa izwe kasisho umnotho kuphela kepha nenhlalonhle yabantu.
Umnotho ngeke usimame umphakathi usantula izidingo, ngeke futhi uthuthuke ekubeni kusekhona ukucwasana, ukungabekezelelani nokungahloniphani.
Inhlekelele yokuzitapela ezitolo nokucekelwa phansi kwengqalasizinda yembule obala izinkinga ezinzulu iNingizimu Afrika ebhekene nazo.
Ububha, ukwentuleka kwemisebenzi nokucwasana ngokwebala nangobuzwe yizinkinga okumele zingasali ngaphandle ezinhlelweni zikamengameli neziphathimandla ekukhucululeni nasekuthuthukiseni izwe.
Siyavumelana impela nombono wenhlangano yowayengumengameli wakuleli, iThabo Mbeki Foundation, ethi izimo ezinzima abantu abaphila kuzo yizo ezibhebhethekise lezi zibhelu.
Le nhlangano inxuse ukuba kuhlangane izinhlaka ezehlukene zilekelele uhulumeni ekulweni nalezi zimo.
Esikufisayo ngukuthi kubanjiswane ukuthuthukisa izwe kepha makungathuthukiswa umnotho kuphela, makukhucululwe nezimo ezingahambisani nenhlalonhle yabantu eziholela ekutheni kungene isihlava sobudlova emphakathini.