Ngididwa ngabezindaba abangaboni ukuhlushwa kukaZuma
MHLELI: Ngivumele ngethule ilaka lami ngendlela enibika ngayo kumaphephandaba. Okungaba awabomdabu, indlu emnyama noma elolimi lamaQadasi nabezindaba kwiSABC.
Angiqale lapha odabeni lukaJacob Zuma. Ningidide nangiqeda uma nginiqhathanisa ngesikhathi sobandlululo ngendlela enanizama ngayo ukubika izinto ezazisihlupha. Ngizocela ukunikhipha kancane nina beSolezwe, ngokubika ngesikhathi sobandlululo.
Kepha kulokhu okwenzeka kule mihla, nani ngiyanifaka. UZuma ugwetshwe ekwakhe, egwetshwa yinkantolo enkulu kunazo zonke eNingizimu Afrika. Indaba iqala lapha.
UZuma ucele uSihlalo weKhomishini iJaji uRaymond Zondo ukuba lishenxe esihlalweni kungene omunye ukuze aqhubeke nokwethula okucelwa yikhomishini.
UZondo unqabile ukwehla esihlalweni. Nina bezindaba nahluleka noma ngingathi nesaba ukumkhumbuza ukuthi uZondo wenqaba ukuba nephini kulo msebenzi. Wayenqabelani? Yini lena ayengafuni yaziwe ngowayezoba yiphini? Ekunqabeni kwakhe ukushenxa esihlalweni, ucele ukuthi iNkantolo yoMthethosisekelo igwebe uZuma iminyaka emibili ebhadla ejele. Nathula futhi nangasho lutho ngokunyathelwa kwamalungelo kaZuma.
Abameli bakaZuma bafake amaphepha ukuphoqa iJaji uZondo ukuba lehle esihlalweni.
INkantolo yoMthethosisekelo imane yamgweba izinyanga ezingu -15 ebhadla ejele. Abezindaba bathula, bangawukhuza lo “mkhuba” oqalwayo wokuthi umuntu agwetshwe engekho ebhokisini futhi engenammeli.
Kungenzeka yini ukuthi iJaji uZondo nozakwabo beNkantolo yoMthethosisekelo, kabasawethembi amajaji asezinkantolo ezinkulu? Sikhuluma nje uZuma uphakathi ejele kodwa azilandelwanga zonke izigaba zokuboshwa nokuthethwa kwecala lakhe. Nginombuzo-ke lapha, ngabe wonke umuntu oboshwayo ngezombangazwe usezovele ayogwetshwa inkantolo yokugcina ezweni?
Sipho Tembe