Masikhulekele ukuthanjiswa kwenhliziyo kaRamaphosa
Izwe lisenkingeni amaloli awasebenzi uphethroli namafutha akusekho emagaraji amaningi ukudla akusatholakali kalula kubi kithina esingatapanga ezitolo.
Siyacela Mengameli Cyril Ramaphosa udedele owayengumengameli ubaba uJacob Zuma ebese niqala ikhomishini entsha niqoke nejaji elisha uZuma ayothula khona ubufakazi. Siyavuma senisibonisile ukuthi akekho ongaphezu komthetho kodwa sesiyacela baba usibuyisele uZuma ukuze izwe llibuyele esimeni.
Inkani nokuqinisa ikhanda angiboni ukuthi kusiza ngani. Buka ukuthi izwe likuphi manje. Buka izinto ezimoshekile. Bangaki nje abantu abaphelelwe wumsebenzi? Bangaki asebeshonile.? Abantu kabasenandaba neCorona. Sekwanele manje baba uRamaphosa. Kunisiza ngani ukuzibona ningamaqhawe ngokubopha umuntu oyedwa kodwa sekufe abantu abaningi sekucekelwe izitolo eziningi? Izwe liyasha Ramaphosa siyacela siyakuncenga khulula uZuma ukuze isimo sibuyele kwesijwayelekile sizobulawa yindlala njengoba isisiqalile nje. Kwamanje ngiyazi ukuthi abaholi abanjengoRamaphosa omacaphuna kusale akuzweli lutho kubona ngoba banakho konke kodwa sale usucabangela abakuvotela mengameli bakunika lawa mandla onawo manje.
Noma ngabe kawunandaba nathi kodwa siyakuncenga baba.sicela wenze okulungile ukhulule uZuma libuye izwe lethu ngoba kukhulu okusazosehlela uma niqhubeka nokuvalela Zuma. Noma ngabe nanibhejile nobheje nabo ukuthi uyogcina umbophile uZuma kulungile siyavuma usumehlulile ngoba usegcine eboshiwe bafa nabantu baphelelwa yimsebenzi, abanye baboshwa abanye balahlekelwa ngamabhizinisi abo kodwa-ke ubuqhawe bakho sesiyabubona.
Sesicela nimdedele manje singaze sifane ne-Ethiopia njengoba kunganyakazi lutho izwe limile akuthina sonke esikwazile ukuyozitapela ezitolo. Izingane zethu nemindeni yethu bazobulawa yindlala. Kukhona nezingane ezisancela ubisi lwebhodlela nezifaka amanabukeni alahlwayo. Zonke lezi zinto kasazi ukuthi sizozithathaphi .Siyacela nakuwe ngqongqoshe Bheki Cele kuyonakala ezweni baningi abantu asebehlukumezekile. Abanye babulawa ngamakhaza kumanje bagade izitolo njengoba kubanda kangaka. Abantu abamnyama sebejikelene bodwa kumanje ngenxa yesimo esibhekene naso lapha phandle.
Ngicela okwazi ukuthandaza aguqe akhuleke acele uMdali athambise inhliziyo kamengameli Ramaphosa. Asingakhulekeli ukuthi izwe liyasha ngoba sizobe simosha umkhuleko lapho kodwa asikhulekele ukuthi uRamaphosa abe nonembeza aphume nezwi lokukhulula uZuma kanjalo nezinkantolo zethu sizikhulekele ukuba ziphume nesinqumo esizoyisa lizwe phambili. Uyafuneka impela umkhuleko njengamanje. Ngokwami nguZuma kuphela ozoqeda yonke le nto ekhona ezweni ngineqiniso lokuthi naye lapho ekhona uyakhala kuwukuthi akanawo amandla okukhuza. Mdedeleni abuye eze kubantu azokhuza ngoba uRamaphosa ukhuza kwithelevishini futhi bambalwa abantu abazi isilungu nababukela ithelevishini. Kahle hle ukhuluma nabamhlophe kuphela ngoba ukhuza ngesilungu.
Thanda Mnikaziwempuphu Chonco