Kubhujiwe kugingqika ibhasi
UMNYANGO wezokuThutha KwaZulu-Natal usujube ithimba elizophenya ngenhlekelele yengozi eyenzeke kugingqika ibhasi emgwaqweni uN3 ngaseMnambithi izolo, okuthiwa kushone kuyo abayisishiyagalolunye kwalimala inqwaba.
Kule nhlekelele, eshiye kukhalwa, kugingqike ibhasi lakwa-Eldo Coaches okuyinkampani yamabhasi ahamba amabanga amade, belisuka eDurban Station eThekwini ekuseni lilibangise eGoli.
Ngokwesitatimende soMnyango wezokuThutha eKZN kushone abayisishiyagalolunye kule ngozi. UNgqongqoshe walo mnyango, uNkk Peggy Nkonyeni, uthe le nhlekelele ibashaqisile, njengoba kuyinyanga yezokuthutha ebhekiswe ekugqugquzeleni ukuphepha emgwaqweni.
“Egameni likahulumeni wesifundazwe, sidlulisa amazwi enduduzo emindenini elahlekelwe. Sinxusa abashayeli baqinisekise ukuthi baphumule ngokwenele ngaphambi kokusebenzisa umgwaqo. Abanikazi bezinto ezithutha umphakathi nabo mabaqinisekise ukuthi izimoto zabo zisesimeni esifanele ukuba semgwaqeni,” kusho uNkk Nkonyeni.
UMnuz Francois Rodgers, oyilungu leDA esiShayamthetho saseKZN, uthe lo mnyango namaphoyisa kumele baphuthumise uphenyo ukuze kusheshe kutholakale imbangela yengozi. Ube esedlulisa amazwi enduduzo emindenini eshonelwe.
Okhulumela abezimo eziphuthumayo kwaNetcare
911, uMnuz Shawn Herbst, uthe izinkomba ziveza ukuthi umshayeli uhlulekile wukulawula ibhasi. “Ibhasi liphaphalaze lashayisa unqenqema lomgwaqo ngaphambi kokuba ligingqike kanti abagibeli bebesaphazeka ngesikhathi liqhubeka nokushaya ungqimphothwe. Ekufikeni kwabezimo eziphuthumayo, bekukhona abagibeli abashonile, bebebalelwa ku-50 abebelimele,” kusho uHerbst.
Abakwa-Eldo Coaches esitatimendeni bakuqinisekisile ukuthi yibhasi labo elibandakanyeke engozini.
“Senza konke okusemandleni ukusiza abagibeli bethu futhi sisebenzisana namaphoyisa. Ngokwemibiko esisayitholile, kuthiwa kuqhume isondo langaphambili lebhasi ngaphambi kokuthi ligingqike.”
“Sinxusa abebenamalungu noma abangani abebesebhasini, abafisa ukuxhumana nathi, basithinte kule nombolo: 011 852 6120/ 011 940 8088/ 012323 5475,” kubhalwe esitatimendeni.
Okhulumela amaphoyisa KwaZulu-Natal, uColonel Thembeka Mbele, uthe amaphoyisa aseColenso aphenya amacala okubulala ngokungenhloso.
Khonamanjalo, kushone owesifazane oneminyaka engu26 kwathi amalungu omndeni amabili aphuthunyiswa esibhedlela ngesikhathi imoto abebehamba ngayo ibandakanyeka engozini nemoto okuvele ukuthi ngeyesikhulu sikahulumeni kumasipala (esingalitholanga igama laso), emgwaqweni uR102 ngaseGingindlovu ngoMsombuluko ntambama.
Esitatimendeni sabakwaIPSS Medical Rescue kuthiwa isikhulu kumasipala nonogada bakhe abathathu bangeniswe esibhedlela.
UColonel Mbele uthe amaphoyisa aseGingindlovu aphenya icala lokubulala ngokungenhloso, wathi imbangela yengozi ayikaziwa.