Kwethulwe ikomiti elizobhekela ezokhetho
NJENGOBA selidumela emasumpeni ngokhetho lohulumeni basekhaya oluzoba ngoNovemba 1, uNgqongqoshe wezokuThutha nokuPhepha koMphakathi KwaZulu-Natal, uNkk Peggy Nkonyeni, izolo wethule ikomiti elihlanganisa amaqembu ehlukene elizongenelela uma kunezinkinga.
Leli komiti lizongenelela uma kunezinkinga ezidinga ukuxazululwa ngokuhlanganyela kwamaqembu.
Elethula izolo KwaDukuza, uthe bahlangane namaqembu angu-18 angenele ukhetho kulesi sifunda. Uthe nabangenele ukhetho ngokuzimela bebekhona kwethulwa leli komiti.
“Inhloso wukuthi kube nokubambisana uma kuba nezinkinga njengoba kukhankaselwa ukhetho. Sizohlala sixoxe ngazo zonke izinkinga sizixazulule.”
Uthe amaqembu nabangenele ukhetho ngokuzimela basayine isibopho sokukhankasa nokuziphatha ngendlela efanele nelindelekile njengoba kuyiwa okhethweni.
“Siyethemba abantu namaqembu bazokhanksa ngokuthula, ukhetho kube ngolunokuthula nolukhululekile.”
Kwenzeka lokhu nje ngoMsombuluko ikhomishini eyengamele ukhetho eKZN, ibe nomcimbi othi awufane lapho amaqembu nabangenele ukhetho ngokuzimela besayine khona isibopho sokukhankasa ngokuthula njengoba kuzovotwa.
Amaqembu okubalwa i-ANC, IFP namanye azibophezele ekutheni azogqugquzela ukuthula ngalesi sikhathi sokhetho.
Khonamanjalo uMengameli Cyril Ramaphosa umemezele ukuthi ngosuku lokhetho kuzoba yiholidi likazwelonke.
Kujwayelekile ukuthi ngosuku lokhetho kube yiholidi ukuze abantu bakwazi ukuphuma bayovota kahle bengasebenzi.
URamaphosa ukhumbuze abavoti ukuthi bahloniphe imigomo ebekiwe yokuzivikela kwiCovid-19.
“Sikhumbuza abavoti ukuthi bazokwazi ukuvota kuphela lapho bebhalise khona.”
IKhomishini yezokhetho ikwamukele ukuthi lolu suku luzoba yiholidi kuleli.