Sethemba isizwe sisazohlomula ebuhlakanini bukaMogoeng
AKUKHO soka lingenasici. Lesi sisho sigqamile kulezi zinsuku kade kuvaleliswa obeyinhloko yamajaji kuleli iJaji Mogoeng Mogoeng.
NgoMsombuluko bekuwusuku lokugcina uMogoeng eyinhloko yamajaji njengoba bekuphela inkontileka yakhe ayisayina ngo-2011 ebekwa kulesi sikhundla.
Ngawo uMsombuluko ezinkundleni ezehlukene abantu bebephawula ngemisebenzi emihle nobuhlakani bukaMogoeng ngenkathi ephethe lesi sikhundla.
Bakhona nabebeveza ukuthi kubo ubuqotho bakhe ubenawo amabatha kule ndima aseyikhathulile, bebalula umsindo owasuka ngemuva kokuphawula kwakhe ngempi yeminyaka yePalestine ne-Israel lapho azwelana khona ne-Israel egxekwa yizinhlaka ezehlukene emhlabeni jikelele.
“Uma ngiqalekisa i-Israel no-Abraham, uNkulunkulu uzoqalekisa mina. Akukho okunye engingakwenza njengomKrestu ngaphandle kokuthanda ngikhulekele i-Israel ngoba uma ngiyizonda ngizibizela iziqalekiso.” Wagxekwa kakhulu ngale nkulumo uMogoeng waze wayalelwa yikomidi elibhekelele ukuziphatha kwamajaji ukuba axolise, nanqaba ukukwenza.
Kasisophile-ke ukugxila emabaleni abekwa wona uMogoeng kepha simethulela isigqoko ngokuyibamba ishisa kulesi sikhundla, omthetho waso sihambisana nengcindezi.
Sivumelana noMengameli Cyril Ramaphosa uma ethi uMogoeng ube neqhaza elikhulu kwezomthetho nasekuqinisekiseni ukuthi ubulungiswa buyenzeka.
Unconywe kakhulu ngobuqotho, ukumela iqiniso nokumela isinqumo esithathiwe yize kukhona ingcindezi kwabangahambisani naso.
Siyambongela uMogoeng ngokusebenza ngobuqotho, siyethemba nokuthi yize ethatha umhlalaphansi kepha isizwe sisazoqhubeka nokusenga ubuhlakani nolwazi anakho.