Inhloko yamajaji kufanele ikulungele ukusebenzela ubulungiswa
IHLANDLA lokugcina likamehluleli omkhulu, ijaji laseNkantolo yoMthethosisekelo, lisanda kufinyelela esiphethweni.
Sekunethuba lokuqokwa komholi omusha wamajaji. Imibuzo ephambili ithi kuzoqokwa bani, kuzosetshenziswa luphi uhlaka lwezimfuno namakhono, luzogcinwa lonke yini uhlelo lokuhlolwa amakhono luhloniphekile?
Asichome uphaphe lwegwalagwala iJaji uMogoeng Thomas Reetsang Mogoeng:
UMogoeng ube yijaji eliphethe amajaji, kusukela ngo-2011, ngesikhathi eqokwa njengejaji elikhulu. Ufunde khona kwelikaMthaniya, esikhungweni semfundo ephakeme e-University of Zululand (Ongoye) naseNatal University esibizwa nge-University of KwaZuluNatal, nagcine ewuShansela wayo ngo2017.
Ngesikhathi ephethe sibone ukwahlulelwa kwamacala athinte ukusebenza koMvikeli woMphakathi, uSomlomo wasePhalamende, amaqembu ezepolitiki, isinqumo ngombango wenkolo yakwaShembe, ukulawulwa kokubhenywa komthunzi wezinkukhu nokuphathwa ngendlela evulelekile kwenhlolokhono yamajaji.
Inqubekelaphambili siyibonile kodwa kusakuningi okumele kwenziwe ekuvikelweni kobumsulwa bokusebenza kwamajaji.
Yize zikhona izikhalo kodwa ngezakhayo nezizosiza oza emva kwakhe ukuthi athuthukise ukusebenza kahle kwamajaji.
Ukuqokwa kwamajaji:
Isigaba 174 no-175 soMthethosisekelo zilawula ukuqokwa kwamajaji. Amandla okuqoka anikezwe umengameli wona athi akaqoke umuntu oneziqu ezifanele zomthetho aphinde abe ngumuntu okulungele ukuba aqokwe.
I-Judicial Services Commission (JSC) iyona eyengamela inhlolokhono iphinde yenze izincomo ihambise uhlu lwamagama kumengameli angakhetha kuwona.
Ngenxa yokubaluleka kwesikhundla senhloko yamajaji, umengameli umema umphakathi ukuthi wenze izincomo zokuthi ubani abangafisa ukumbona eyijaji elikhulu laseNingizimu
Afrika. Kube sekuvela amagama ayisishiyagalombili.
Ithimba eliqokwe wumengameli lizohlunga khona lucele abathathu kuya kwabayisihlanu ukuthi benziwe inhlolokhono yiJSC.
Yize kuncomeka lokho, ngenxa yokuba sobala kohlelo ukuze siluthembe, nakhona kunemibuzo yokuthi ithimba likamengameli liqokwe kanjani, iphi intsha kulona, baphi abaholi bezinhlangano zabameli, aphi amashoshozela avikela amalungelo emiphakathi, amandla abo bawathathaphi, kungabe bavunyelwa wuMthethosisekelo yini nokuthi umsebenzi weJSC angeke yini ushayisane naleli thimba?
Yize ikhona le mibuzo kodwa sikushayela ihlombe njalo ukuvuleleka nokuba sobala kwezinhlelo ezifana nalezi.
Igama likaJaji John Hlophe likhona, naye okwamukelile ukuphakanyiswa kwakhe, imfundo nesikhathi sakhe ehola amajaji, kumenza abe ngabanye abanesipiliyoni kule ndima yezomthetho. Kunefu elimnyama ahamba nalo njengoba esolwa ngokuzama ukunxenxa amajaji ukuthi avune owayengumengameli kuleli uJacob Zuma. Le into engase yenze angaphumeleli.
Igama likaJaji Mbuyiseli Madlanga nalo likhona futhi ukwamukelile ukuqokwa kwakhe. Ihlandla lokuhola amanye amajaji analo lincane, nelingase linqunde amathuba akhe okuthola lesi sihlalo. Kepha uyahlonishwa kakhulu ngobuholi bakhe nendlela aziphatha ngayo uma ehlulela.
UJaji Mandisa Maya, uphethe eNkantolo yokuBuyekezwa kwamaCala, usethole ulwazi lokuhola amanye amajaji isikhathi eside nokunguyena abahlaziyi abasola ukuthi angase asithathe lesi sikhundla. Uma eqokwa uyoba ngowesifazane wokuqala ukuba yinhloko yamajaji eNingizimu Afrika.
UDkt Wallace Mgoqi yize ebeqokiwe, ukhethe ukuhoxa kulo mjaho.
U-Adv Busisiwe Mkhwebane nonguMvikeli woMphakathi uqokiwe kodwa angase abhekane nobunzima ngoba akakaze abe yijaji futhi unecala asabhekane nalo.
UJaji Dunstan Mlambo uphethe enkantolo ezinze eGauteng. Le nkantolo isaphethe amacala anzima nanohlonze. Angase athole ubunzima ngendlela abuza ngayo abanye uma kwenziwa inhlolokhono yeJSC nokuziphatha kwakhe uma engamele amacala.
U-Adv. Alan Nelson SC, ngummeli osemnkantshubomvu kodwa akakaze aphathe amanye amajaji.
IPhini leNhloko yamaJaji uRaymond Zondo, ngokuphatha nokulawula izinkantolo unalo ulwazi nekhono. Indlela aphathe ngayo iKhomishini yokuLawulwa koMbuso yiDlanzana izoba sematheni. Neminyaka anayo ngaphambi kokuthatha umhlalaphansi isimincane, bakhona abangathi alukho ushintsho olungako angeza nalo kule minyaka esisele.
Sekuyisikhathi sokuthi ukukhethwa kwamajaji kuhambisane nezidingo, kube yithuluzi lokuletha ubulungiswa, ukugqoza kwentuthuko nezobuchwepheshe, ukungafundiswa nokukhethwa okusobala kwabafuna ukuba amajaji nokuthenywa kwezinkantolo umphakathi. Bonke laba kumele balungele ukusebenzela ubulungiswa nabantu baseNingizimu Afrika.