Owe-netball uthathe ikhefu ngenxa yokhwantalala
USEKHETHE ukuhlaba ikhefu umdlali wakuleli we-netball, uLenize Potgieter, ngenxa yokuhaqwa wukhwantalala.
UPotgieter ubeyingxenye yeqembu lakuleli lesizwe ebelilungiselela ukuyobhekana neJamaica neTrinidad & Tobago eStellenbosch.
Lugcine lubhuntshile lolo hambo ngenxa yemigomo yokuqanda ukubhebhetheka kwe-Covid 19 kodwa amaProteas asebheke uhambo olusha olubheke e-Ireland kuyona le nyanga.
Azodlala imidlalo emithathu eDublin lapho ezobhekana khona ne-Ireland, Northern Ireland neWales. Ebhala ekhasini lakhe kwi-Instagram, uPotgieter uthe usazoma isikhashana engadlali ukuze abuyele esimeni somqondo esifanele.
"Ngeke ngibe yingxenye yeqembu lamaProteas elizodlala eDublin. Okokuqala ngingekho kule minyaka eyisikhombisa eyedlule,” kusho uPotgieter.
"Ngemuva kokudlala kwiSSN (Suncorp Super Netball) impilo yami ishintshe kakhulu. Ngizizwa ngethukile, ngiphatheke kabi nokwenza ngihaqwe uvalo ngiphinde ngiphazamiseke emqondweni.
"Bekungavumi ngidle, ngizilolonge noma ngilale ngingakhalanga noma ngigonwe ngumama. Ngehlelwe isisindo somzimba ngokushesha, ngehle ngamakhilo ayisikhombisa ezinsukwini ezinhlanu. Bekungavumi nokuthi ngiyojoyina ikhempu yamaProteas, izinyembezi zazehlela esikhumulweni sezindiza ngaze ngathinta umama ngocingo, kodwa ngagcina ngiyile ekhempini eStellenbosch.
"Sixilongwa ngodokotela bathola ukuthi ngihlaselwe ukhwantalala. Ngemuva kokuxoxisana nabo sithathe isinqumo sokuthi ngingayi phesheya.
"Ngibafisela inhlanhla ozakwethu, ngizoyibuka imidlalo kwithelevishini. Ngizobuyela enkundleni kungekudala."
UPotgieter ungomunye wosaziwayo bezemidlalo asebekhethe ukuthatha ikhefu ngenxa yezifo ezithinta umqondo. Abanye asebeke badlula esimeni esifanayo ngumdlali we-tennis uNaomi Osaka, owama-gymnastics uSimone Biles, owekhilikithi uBen Stokes nabanye. Uthole imilayezo eminingi emkhuthazayo ekhasini lakhe eqhamuka emndenini, abangani, abalandeli nozakwabo kwelesizwe.
"Ngiyaziqhenya ngawe. Ngizokweseka ngokuphelele. Uzinakekele nathi sizokubeka emikhulekweni. Angingabazi ukuthi uzobuya usasezingeni elifanayo noma elingaphezulu, "kubhala ukaputeni wamaProteas uBongiwe Msomi.