Olweziqu zokuqeqesha luyinkinga kwiGallants
KUBANJWA kuyayekwa kwiMarumo Gallants enengcindezi yokuqasha umqeqeshi oneziqu ezifanele ngaphambi komdlalo weCAF Confederation Cup ngoLwesihlanu.
IGallants isanda kukhomba indlela uSebastien Migne waseFrance, imsola ngokudelela ngesikhathi ekhuluma noHarris Cheu oyinhloko yabaqeqeshi. Leli qembu lidinga umqeqeshi ozoba sebhentshini ngoLwesihlanu emdlalweni weConfederation
Cup uma selibhekene ne-AS Vita yaseDemocratic Republic of Congo (DRC).
Umdlalo uzoba sePeter Mokaba Stadium, ePolokwane, ngo-6 ntambama. Inkinga ebhekene neGallants wukuthola umqeqeshi oneziqu zokuqeqesha zeCAF A Licence noma eze-Uefa Pro Licence okuyizinga elidingwa yinhlangano eyengamele ibhola e-Afrika, iConfederation of African Football (CAF).
Le nhlangano iqale ukuqinisa lo mthetho nyakenye, yavalela ngaphandle abaqeqeshi abangu-21 bamaqembu abezodlala kwiConfederation nawabezoyibamba kwiChampions League.
Kunemibiko ethi iGallants ihlela ukuqasha u-Owen Da
Gama oxoshwe yiTS Galaxy ngesonto eledlule. UDa Gama akanazo iziqu ezidingwa yiCAF. Kungenzeka iGallants imqashele uShaun Bartlett obekade eyiphini lakhe oneziqu ze-Uefa Pro Licence. UBartlett wesule isugubhukane kwiGalaxy izolo.
URufus Matsena weGallants uthe bazomethula noma yinini umqeqeshi.
"Okwamanje iqembu liqeqeshwa nguMpho Maleka noDavid Mathebula okuyibona abajwayele ukubamba uma kunjena. Sizomqasha umqeqeshi oneziqu ezifanele ezidingwa yiCAF. Lokhu kungenzeka kusasa (namuhla), ngoLwesine noma abonakale ebhentshini ngosuku lomdlalo ngoLwesihlanu," kusho uMatsena.
Uwachithile amahlebezi okuthi bazama ukubuyisa uDylan Kerr oneziqu ze-Uefa A Licence abamchithe ngaphambi kokuqala kwesizini ka-2021/2022.
"UKerr wahamba ngenxa yakho ukuthi akanazo iziqu ezimvumela ukuqeqesha kwiCAF. Ngamtshela ukuthi iziqu zakhe azikho ezingeni elidingwa yiCAF," kusho uMatsena.
Ezinyangeni ezedlule uKerr ucashunwe ethi umangele ukuthi uxoshelweni kwiGallants ngoba ngokwakhe iziqu ze-Uefa A Licence zingaphezulu kweCaf A Licence ngokwezinga.
Abaqeqeshi baseMzansi abazohola amaqembu emidlalweni yeCAF okunguManqoba Mngqithi, Rhulani Mokwena, Steve Khompela beMamelodi Sundowns noBenni McCarthy waMaZulu banezicucu ezifanele. Kanjalo nabe-Orlando Pirates, uMandla Ncikazi noFadlu Davids.