Iyaqhubeka imizamo yokulungisa eyobeSafa eThekwini
ISIQALIWE imizamo yokuthi kuyiwe okhethweni lukazwelonke, lweSouth African Football Association (Safa), isifunda saseThekwini sesinobuholi obubodwa.
UKwenzokwakhe Ngwenya, ongusihlalo wale nhlangano KwaZulu-Natal, utshele Isolezwe ukuthi emasontweni edlule bekunomhlangano phakathi kohlangothi lwaseHoy Park, oluholwa ngu-Alpha Mchunu, nolukaMazwi Mkhize oluzinze eCurries Fountain.
Sekuphele iminyaka eyisishiyagalombili lezi zinhlangothi zibanga ukuphatha iSafa eThekwini.
Lokhu kudale izinkinga kumaLocal Football
Association (LFA) njengoba egcine esehlukene phakathi.
Siye sashuba phambilini isimo kangangokuthi bekuba yinkinga ukukhipha iqembu leSAB League elizodlala kweyokuhlungela ukunyukela kwi-ABC Motsepe.
UNgwenya uthe emhlanganweni walezi zinhlangothi bekuchitshiyelwa ezinye zezigaba zomthethosisekelo. Uthe zombili ziphinde zavuma ukuthi kuyiwe okhethweni lukazwelonke ngasekupheleni konyaka ozayo, lesi sifunda sesibuswa ubuholi obubodwa.
"Udaba lokulungisa inkinga yesifunda seTheku luseqhulwini ehhovisini leSafa kuzwelonke. Sidonswe ngendlebe ukuthi kuphele lo nyaka sekunobuholi obubodwa. Ngikhuluma nawe nje amanye amaLFA aseqalile ukukhetha. Uma kuqedwa kuzodlulelwa ezingeni lezifunda,” kusho uNgwenya.
Mayelana nokuthi bazolungenela noma cha ukhetho uMkhize noMchunu, uNgwenya uthe: "Kanginalwazi ngalokho. Engikwaziyo ukuthi kuzoncika ekutheni amaLFA ayawaphakamisa yini amagama abo. Uma ebaphakamisa kangiyiboni inkinga. Nakuba ngingeke ngidalule okuningi kodwa kubukeka uzophela lo nyaka sesiyinqobile le nkinga.”
Phambilini umsebenzi wokuxazulula le nkinga uke wanikwa izikhulu zeSafa kuzwelonke okubalwa kuzo u-Andile Ndengezi nomahluleli ozimele, uHilton Epstein.
Bonke bahluleke bancama.
UNgwenya uveze nokuthi kusasa iSafa kulesi sifundazwe izohlangana noMnyango wezeMfundo nowezeMidlalo ukubhunga ngokuthuthukisa ibhola lezikole.
Nakulo leli bhola, impi kayikapheli phakathi kweSafa neSouth African Schools Football Association (Sasfa) eholwa nguMandla "Shoes" Mazibuko.
Eminyakeni edlule iSafa, eholwa nguDanny Jordan, yaxosha iSasfa ngaphansi kwayo maqede yathi isizoziphathela yona ibhola lezikole.