USibisi weneme ngamabhokisa acabe indlela eya eLosotho
UMENGAMELI weKZN Olympic Style Boxing Organisation, uSandile Sibisi, weneme ngezinga elitshengiswe amabhokisa akhe emqhudelwaneni kazwelonke, iSanabo Youth And Elite Championships, obungeledlule.
USibisi uveze ukuthi ibhokisa lesifazane lasesifundeni Umzinyathi, uLethokuhle Sibisi, livotelwe njengebhokisa elivelele esigabeni samaYouth Championship.
Uchaze izinga lalo mqhudelwano njengebeliphezulu ngendlela emangalisayo.
USibisi uthe ukudlala ngokuzinikela nangokuzikhandla kwamabhokisa akhe kuqinisa amathuba okwanda kwesibalo sabaKwaZulu-Natal abazofakwa esikwatini esizomela elakuleli kuma-AUSC Rigion 5 Game azoba ngoDisemba 3-12, eMaseru, eLesotho.
Amabhokisa azoshaya into ecokeme eLesotho azozibeka ethubeni lokungena endizeni ezolibhekisa kumaCommonwealth Game, azoba eBirmingham, ngonyaka zayo.
Okwamanje kuhlelwe ukuthi kuqokwe amabhokisa awu-12 azoya kodlala eMaseru kodwa kusazobhekisiswa indaba yokuthi anawo yini ama-passport.
Uma labo abathole amagolide bengenawo, kuzothathwa labo abathole amasiliva.
USibisi uveze ukuthi amanye amabhokisa aqavile awahlaselwanga yisifo sokuhayiza, bebezoqoqa inqwaba yezindondo zegolide.
'Kuyasijabulisa siyiKwaZulu-Natal ukubona amabhokisa akithi ethela induku emiqhudelwaneni yezinga eliphezulu. Lokhu kuyizinkomba zokuthi izinga silenyusile kakhulu. Sikholwa ukuthi labo abazongena eqenjini lesizwe bazofika baliphephezelisele phezulu ifulegi lakithi eLesotho, kumaCommonwealth Game nakumaOlympic Game azoba seParis, eFrance, ngo-2024," kubeka uSibisi.
Kuma-Elite Championship, iKwaZulu-Natal ilale isibili. Indawo yokuqala ithathwe yiGauteng, eyesithathu kwaba yi-Eastern Cape.
KumaYouth Champioship, kukhonye osokhaya iWestern Cape, i-Eastern Cape yathatha isibili, iKwaZuluNatal yaphuma kweyesithathu.
USiyabulela Mkhwalo, ongumengameli weSanabo, uncome izinga eliphezulu kulo mqhudelwano.
"Nakuba isigungu esisha seSanabo sifike sekonakele kodwa kusiphathe kabi kakhulu ukungabi namabhokisa eTokyo (kuma-Olympic).
“Empeleni lesi simo sibe yihlazo kwiNingizimu Afrika. Ukulungiselela ama-Olympic akuyona into elula, kuthatha cishe iminyaka eyisishiyagalombili kuya phezulu. Empeleni thina sesishiywe yisikhathi.
"Alandelayo ango-2024, lokhu kusho ukuthi sisalelwe u-2022 no-2023. Nakuba kunzima kunjalo, sizozama ukuba namabhokisa kuma-Olympic alandelayo. Isikwati esizosikhetha ngemuva komqhudelwano obuseKapa yiso esizosimela kumaCommonwealth Game angoJulayi wangonyaka ozayo eBirmingham, e-England," kubeka uMkhwalo.
Nakuma-Olympic ango-2016, eRio de Janeiro, eBrazil, elakuleli lalingenamabhokisa.