UHunt akagxilile kwiChiefs, ubheke ezakhe
UMQEQESHI weChippa United, uGavin Hunt, akaphelelwa ubuthongo ngoba nakhu ezobhekana neKaizer Chiefs okokuqala kusukela leli qembu lamxosha ngasekupheleni kwesizini edlule.
EzikaHunt, iChippa
United zizokwamukela iChiefs emdlalweni weDStv Premiership ngoMgqibelo ngo-5.30 ntambama, e-FNB Stadium, eSoweto.
UHunt uhambe ibanga elide neChiefs kwiCaf Champions League ngesizini edlule kodwa izinto bezimuphika emidlalweni yeligi, behleli ngaphandle kweTop 8, nokuholele ekutheni agcine ekhonjwa indlela sekusele imidlalo emibili kusongwe imidlalo yePremiership.
Uzobe eqala ukubuyela e-FNB Stadium kusukela axoshwa.
IChippa evike izembe ngesizini edlule, ayizange iyiqale kahle isizini entsha kwazise isanqobe kanye kuphela emidlalweni eyisithupha ka- 2021/2022. Lokhu kwenza uHunt ahlale ecabanga ngokuthi uzosiguqula kanjani isimo abhekene naso ngoba abadlali abaningi abekho ngenxa yezizathu ezahlukene, ngokusho kwakhe.
“Namanje angikashintshi, ngisalizonda ngendlela efanayo nakudala ikhefu phakathi kwemidlalo. Ngiyazi ukuthi isimo esifanayo kubona bonke abaqeqeshi kodwa ngizikhulumela mina. Ngiyalizonda ikhefu ngoba liphazamisa konke lokhu osuke ukuzuzile.
“Ngiyakhala manje kodwa ngiyazi ukuthi nangenyanga ezayo kusazoba yinto efanayo,” usho kanje izolo ekuseni ekhuluma neSolezwe.
Ngaphambi kokuma kwemidlalo yeligi, uHunt ubekhala ngezinkinga zangokomqondo ezikhungethe iqembu lakhe.
“Kuningi okufanele sikulungise ngokomqondo kodwa uma abadlali bengekho bonke kufana nokudlala ngesikhathi ukuzama ukwenza lokho.
“Ungababuza bonke abaqeqeshi emhlabeni, akukho okutheni ongakwenza uma kunekhefu lemidlalo yeFifa. Muningi umsebenzi osihlalele kodwa kusobala ukuthi kufanele siwumpintshe uma sebebuye bonke abadlali,” kusho lo mqeqeshi sakubalisa.
Ukubuya ngeqembu lakhe elidala ekhefini, uHunt uthe akuyona into ayicabanga ngisho elele.
“Yindaba enkulu kinina bezindaba leyo. Hhayi mina ngoba ngizobe ngingaqali ukubhekana neqembu esengike ngasebenza kulona,” usho kanje.
“Umdlalo weChiefs uyafana neminye kimina ngakho-ke ngiya ngomqondo owodwa wokubuya namaphuzu agcwele.”
IChiefs nayo iya kulo mdlalo umqeqeshi wayo uStuart Baxter ongene endaweni kaHunt ethwele kanzima kwazise imiphumela emihle iyagqoza.
Isimo seChiefs sithi asifane neseChippa ngoba nayo isawaqoqe kanye kuphela amaphuzu agcwele emidlalweni eyisithupha. UHunt uzihlangulile ekuphawuleni ngokwenzeka kuBaxter ongene esikhundleni sakhe.
“Kungaba elikhulu iphutha ukunaka ukuthi kwenzekani kamakhelwane ekubeni nami nginezami ezingimele.”
Izolo ekuseni usihlalo weChippa, uSiviwe Mpengesi ubhalele abalandeli incwadi, ebaqinisa idolo ngokuthi isimo sizojika ngoba bayakubona okuzanywa uHunt.