Kubulawe umaskanda ehostela
UMASKANDA othelwe othulini ngoyaba lwezinhlamvu ehostela laKwaMashu ngeSonto ushiye ingoduso engabeletha noma nini. ULindo "Khalasi" Gumede (24) waseHluhluwe uhlaselwe ngabantu abangaziwa, wadutshulwa ngentululwane yezinhlamvu ephuma emcimbini obusezitolo zakwaShange. Ngokusho kukamfowabo, uTeaspoon Gumede, uKhalasi utholakale eselimele enamanxeba okudutshulwa, okusolakala ukuthi ubebanjwa inkunzi ngoba ucingo lwakhe alukatholakali.
"Lokhu kwenzeke ngesikhathi kuhambe ugesi KwaMashu ngeSonto phakathi kuka-6 no-8 ebusuku."
UTeaspoon uthe bamphuthumise esibhedlela iMahatma Gandhi Memorial, ePhoenix kodwa washonela endleleni.
“Okubuhlungu ushiye intombi yakhe (uNksz Nosipho Mthiyane) ikhulelwe. Nayo ingateta noma yinini," kuphetha uTeaspoon.
Ngokusho komunye umthombo, uKhalasi ubehamba namagidangoma akhe kwaqhamuka abantu bavulela ngenhlamvu kwahlakazeka wonke umuntu.
"Uma ngifika endlini wayengekho. Samlinda kodwa wangafika. Ngibe sengiyomqalaza. Ngamthola edindilizile," kusho umthombo.
Okhulumela amaphoyisa aKwaZulu-Natal, uColonel Thembeka Mbele, uthe uKhalasi wadutshulwa emhlane nasekhwapheni langakwesokunxele. "Uphenyo lwamaphoyisa luholele ekuboshweni kwebhungu elineminyaka ewu-23 elibekwe icala lokubulala.
Ukubulawa kukaKhalasi obesakhiphe i-albhamu eyodwa esihloko sithi Bahlekisa Ngami kukhalise inqwaba yabalandeli balo mculo kwazise uqale engumlandeli omkhulu kaMjikijelwa Ngubane, naye ongasekho.
ULindokuhle Dlomo weMahlolamvula Music uthe bahlele umcimbi kusasa ngo-3 ntambama eBhekuzulu Hall, KwaMashu wokuqongelela imali yokungcwaba uKhalasi. Kuze kwashaya isikhathi sokushicilela kungakaziwa ngezinhlelo zokufihlwa kwalo mculi.