Amaciko akuleli ayonandisa eDubai
UZOVULWA ngabaculi bakuleli umcimbi ozobanjelwa eDubai, iThe World
Expo 2020, nozophinde ukhonjiswe bukhoma kuMzansi Magic (161) naku1Magic (103), ngo-9 ebusuku ngeSonto.
Kubaculi nosaziwayo abazohambela lo mcimbi, abazofulathela elakuleli namhlanje, kubalwa uSho Madjozi, Pabi Moloi, Thando Thabethe, Coenie de Villiers, Dr Nothembi Mkhwebane, Khuzani Mpungose, Mzansi Youth, Drakensberg Boys Choirs nabanye.
Kulo mcimbi abaculi nabalingisi bakuleli bazobe beyoqhakambisa ubuhle bakuleli kuhlanganisa namasiko. Kodwa okukhulu ngawo ukubheka umkhakha wamaciko nokuthi ungavuselelwa kanjani ngemuva kokukhahlanyezwa iCovid-19.
UKhuzani uthe ukujabulele ukuba yingxenye yalo mcimbi futhi uthemba ukuthi kukhulu azokufunda kuwona njengoba ezohlangana namaciko akwamanye amazwe.
“Ngiyabonga kubona bonke abasinike ithuba elifana naleli. Ngiyathemba ukuthi abantu bakwamanye amazwe bazokuthanda esizobakhombisa khona nabo bonke ozakwethu engiya nabo kuloya mcimbi. Ngiyomela abafowethu kumaskandi kulo mcimbi,” kuchaza yena.
U-Imtiaz Patel, onguSihlalo kwaMultiChoice, uveze ukuthi iThe World Expo 2020 ingenye yemicimbi ekhombisa imisebenzi ehlukene eyenziwa ngamaciko aqhamuka emazweni ahlukene emhlabeni.
“Ngalo mcimbi sisuke siyoheha osomabhizinisi bakwamanye amazwe ukuthi beze kuleli futhi bafake imali emkhakheni wezokuvakasha. Umkhakha wamaciko nowokuvakasha yiwona oshayeke kakhulu ngesikhathi seCovid-19 ngakho kulo mcimbi yomibili le mikhakha iyothola ithuba lokuthi iphinde ime futhi ukuze iqhubeke isebenze,” kuchaza u-Imtiaz.