Ibhemile kwabeba ugesi namanzi eThekwini
INHLANZI izoshelwa ngamanzi ebantwini baseThekwini abakokotela amamitha ngenhloso yokungawakhokheli amanzi nogesi njengoba uMasipala iTheku uzofaka amamitha amasha aziwa ngokuthi yiSmart Metering System.
Umasipala uthe la mamitha azowubikela ngokuphazima kweso uma kukhona umuntu ozama ukukokotela ugesi noma amanzi.
IMeya yeTheku, uMnuz Mxolisi Kaunda, usanda kwethula lolu hlelo athi bahlose ngalo ukuphendula ngokushesha ezinkingeni zabahlali abakhala ngogesi namanzi eThekwini.
UKaunda uthe abantu bavamise ukukhala ngokuthola izincwadi ezinezikweletu ezinkulu, futhi kabaphendulwa ngokushesha uma bebikela umasipala ngezinkinga ezithinta ugesi namanzi abahlangabezana nazo.
“Azosilekelela la mamitha ekulweni nokuntshontshwa kukagesi namanzi, abike ngokushesha uma kukhona ophazamisa ukusebenza kwawo,” kusho uKaunda.
Uncome lolu hlelo wathi luzolekelela abantu benze izinto eziqondene nogesi besebenzisa i-App yabathengi.
UKaunda uthe ngalolu hlelo olusha, izoba wumlando eThekwini indaba yokucinywa kukagesi ngenhloso yokuwonga.
“Soqinisekisa abantu abacishelwa ugesi kube mnyama bhuqe kodwa sizokwazi ukuthi silawule isimo ngokuthi sikunike umthamo othile kagesi ozokwazi ukugcina isitofu, ifriji kusebenza nezibani zikhanya,” kusho uKaunda.
Uxwayise abantu ukuthi basebenzise ugesi ngendlela ewongayo bangenzi izinto eziningi ngesikhathi esisodwa.
Umasipala uzoqala uzwe amanzi ngobhoko ngalolu hlelo ngokuthi ulufake emizini engu120 000. Uma lusebenza kahle luzobe selufakelwa nalabo abangu-600 000 abazobe besele.
Konke lokhu umasipala uthi uzobe ukwenza bhusende akudingeki ngisho indibilish ezobe iqhamuka kwizakhamuzi.