‘Alikafiki esigabeni senhlekelele yokuntula amanzi izwe’
ASIKAFIKI esigabeni sokuba sihlonzwe njengendawo evelelwe inhlekelele ngenxa yokuntula amanzi isifundazwe, iKwaZulu-Natal.
Nakuba kukhona izingxenye zesifundazwe okudingeka kungenelwe kuzona ngokushesha abantu bahlinzekwe ngamanzi kodwa iningi lomasipala linawo amanzi.
Lokhu kushiwo nguNgqongqoshe wezaManzi nokuThuthwa kweNdle kuleli, uMnuz Senzo Mchunu, esithangamini nabezindaba e-Olive Convention Centre, eThekwini, izolo.
Usohambeni lwezinsuku ezintathu KwaZulu-Natal namaphini akhe amabili. Bazohlangana nesigungu esihola isifundazwe nomasipala kubhungwe ngezinselelo nokusebenza ngokubambisana kwezinhlaka ezintathu zikahulumeni ukuze kuqinisekiswe ukuthi umphakathi uphakelwa amanzi.
Uhlabe ukungavalwa kwamapayipi agxaza amanzi, abacekela ngamabomu ingqalasizinda yamanzi nabaphazamisa ukusebenza kwayo nokungaphothulwa kwemisebenzi yokuthuthukiswa kwengqalasizinda yamanzi endala.
Uthe amanzi ayimpilo futhi kuyilungelo lomuntu ukuthi ahlinzekwe ngawo. Uhlela ukuba nomhlangano noNgqongqoshe weMfundo eyisiSekelo, uNkk
Angie Motshekga, ngenhloso yokuqhamuka namasu okuqeda amathoyilethi omgodi ezikoleni.
“Ayikho inhlekelele yokuntuleka kwamanzi ezweni nakulesi sifundazwe. Kunezindawo ezingenawo amanzi ngezizathu ezihlukene njengokuqhuma kwepayipi noma kuthuthukiswa ingqalasizinda okungachazi ukuthi sekunenhlekelele,” kusho uMchunu.
Ukhuthaze izakhamuzi ukuba zisebenzise amanzi ngendlela eyongayo, zingawaxhaphazi.
UNdunankulu KwaZulu-Natal, uMnuz Sihle Zikalala, uxolisile ezakhamuzini zaseThekwini ezikhala ngokuthi azibikelwanga ngokuvalelwa amanzi ngenhloso yokuwonga.
Uthe lokhu kubangelwe ukuthi kuthuthukiswa izindawo ezigcina amanzi futhi kushintshwa nengqalasizinda yawo esindala, okudinga ukuba amanzi avalwe ngezikhathi ezithile.
Uhambe emazwini kaMchunu, wagcizelela ukuthi ayikho inhlekelele yokuntuleka kwamanzi kodwa kunezinselelo ezingxenyeni ezithile esifundazweni.
“Inhlekelele yagcina ukubonakala ngo-2012 lapho kwakunesomiso esaholela nasekufeni kwemfuyo,” kusho uZikalala.
Ubuholi besifundazwe bethulele uMchunu uhlelo abanalo lokuphakelwa kwemiphakathi amanzi athe ugculisekile ngalo.
Ube esehlangana nabehhovisi lezamanzi esifundazweni nabamabhodi ezinkampani zikahulumeni ezengamele amanzi uMgeni noMhlathuze
Namhlanje uzohlangana nezimeya nabengamele amanzi emikhandlwini khona ezothola isithombe esiphelele ngezinselele nezinhlelo zokuphakela abantu amanzi.
Ukhuze abantu abagxumeka imijondolo noma kuphi, wathi akulungile ngoba kuphazamisa uhulumeni ezinhlelweni zokuhlinzeka leyo ndawo ngamanzi nokuthuthwa kwendle.
Ekuqaleni konyaka ozayo umnyango kaMchunu uzosingatha ingqungquthela yezamanzi ezweni okuzobhungwa khona ngesimo sokuphakelwa kwabantu amanzi kuleli.