Akazenyezi ngokukhubazeka
AKAYINGENI eyozidabukela owesifazane waseMtubatuba, owanqunywa izinyawo zombili. UNksz Linda Lembede (28), ongumsunguli wenkampani iBilateral Queen, ephekela imicimbi iphinde ibolekise ngezitsha, uthe wathatha isinqumo sokuthi ngeke aphile ngemali yempesheni yokukhubazeka.
Le ntokazi ithe yazalwa inesifo sikashukela, kwathi ngo-2017 yaphoqeleka ukuthi ishiye izifundo zeBusiness Management ngenxa yokushintsha kwempilo, okwaholela ekutheni inqunywe unyawo.
"Unyawo lwaqala lwabuhlungu kepha anganganaka. Ngokuhamba kwesikhathi lwashintsha lwamnyama, ngagcina ngingasakwazi ukuhamba ngesicathulo esivalekile. Bengilokhu ngiya kodokotela ngithathwa isicubu kwenziwa zonke izinto kwanhlanga zimuka nomoya. Kwagcina kuphoqelekile ukuthi ngibe nemoto engisusa emqashweni ingiyise eklasini.
Unyawo lwalulokhu lunezinkinga lwagcina seluphendukile, okwangaphansi kwaba ngaphezulu. Kwaphuma ubomvu, kububuhlungu sengathi nginezinalithi. Ngabona ukuthi kumele ngiyonqunywa," kuchaza uNksz Lembede.
Uthe kwathatha isikhathi ngaphambi kokuthi aphume endlini ngemuva kokunqunywa esaba abantu.
"Ngisesesibhedlela ngathola uMsamariya owathi uzokhokhela izifundo zokupheka uma ngithanda ukuzenza. Ngo-2019 nganquma ukuyeka ukuhlala ngikhala, ngizibuza izinto eziningi njengokuthi ngubani ongathatha unkosikazi ongenamlenze? Ngingazi ukuthi ngisazonqunywa omunye."
Waqala ukufundela ukuba ngumpheki kodwa akuphelanga isikhathi eside, olwesibili unyawo lwaqala lwabuhlungu.
"Kulokhu yonke into yayishesha ngagcina sengihluleka ukusuka endlini engihlala kuyo ngiye ekilasini. Ngisho othisha bangitshela ukuthi angihambe ngiyolungisa impilo yami. Ngaqale ngazindela ngaqhubeka nokufunda kodwa ngingasayi ekhishini.
"Inhliziyo yami yaba buhlungu ngoba ngase ngamukele ukuthi nginonyawo olulodwa. Ngemuva kokunqunywa ngabuyela ekhaya ngaba nokhwantalala." Nyakenye wabuyela esikoleni kodwa uMsamariya obemkhokhela wathi ibhizinisi lakhe liphazamisekile ngenxa yeCovid-19 ngakho-ke ngeke esakwazi ukumkhokhela.
"Ngazitshela ukuthi angisabheki emuva ngizoqala ibhizinisi lami lokupheka ngisebenzise ulwazi enginalo. I-Corona yangiphazamisa kodwa ngiyakwazi ukuziphilisa. Inhloso yami ukuthi ngithule umthwalo kudadewethu okhokhela umshwalense wezempilo wami. Ngihlose nokufeza iphupho engangivele nginalo ngaphambi kokukhubazeka. Uma ngithole ithuba ngiye ngibhale ezinkundleni zokuxhumana, ngikhuthaza abantu ukuthi basukume banyathele izinkinga ngoba ngikhuluma ngento engiyenza zonke izinsuku."