Alusukunyelwe olokuba manqika kwabezempilo ukugoma
ABASEBENZI bezempilo babaluleke kakhulu empini yokulwa nobhubhane lweCovid-19, ngakho kuyakhathaza ukuthi kunabangaphezu kuka-20 000 abangayingeni eyokugomela igciwane KwaZulu-Natal.
Lokhu kusho ukuthi isibalo sabezempilo abangagomile siphezulu kakhulu njengoba izwe linezifundazwe eziyisishiyagalolunye.
INhloko yoMnyango wezeMpilo eKZN, uDkt Sandile Tshabalala, ithe umnyango ukhathazekile ngabasebenzi abangazange bagome.
UTshabalala uthe umnyango uhlose ukuthi kushaye uDisemba ube usugome abantu abangu-7 million, yize okwamanje kusajove abangu-29%. Umnyango usuhlanganise lolu hlelo nokugqugquzela abasebenzi bezempilo ukuba bagome.
Kunezinkoleloze ezifafazwa emiphakathini eyahlukene ngomgomo okunomthelela ekuhuduleni izinyawo kwabantu. Ngakho-ke njengoba abasebenzi bezempilo beyingxenye yemiphakathi, akumangazi ukuthi nakubo kube nabangabazayo.
Isimo esibhekene naso sikhona nakwamanye amazwe anjenge-United States of America, lapho kukhona inqwaba yabasebenzi esatshiswa ngokuxoshwa ngenxa yokungafuni ukugomela iCovid-19.
Lokhu kukhomba ukuthi kufanele kube nokukhathazeka kwaboMnyango wezeMpilo ngoba siyabadinga kakhulu abasebenzi bezempilo ekulweni neCovid-19.
Kuzokhumbuleka ukuthi kwakuqalwe ngabo abezempilo ngesikhathi kufika umgomo kuleli, kwenzelwa ukuthi bavikeleke ngoba basekhaleni lempi.
Uma-ke abezempilo bengagomile lokho kubashiya besengozini yokuthola igciwane bese kukhinyabezeka izinhlelo zikahulumeni zokulwa neCovid-19.
Nokho-ke kuyakhuthaza ukuzibophezela komnyango ukuthi uzothola umnyombo wokuba madolonzima kwabasebenzi.
Kufanele izinyunyana zibambe iqhaza ekusizeni umnyango ukuthi uqonde izizathu zokuthi kungani abanye bezempilo bengafuni ukugoma.
Ekugcineni, umnyango kufanele ulalele abasebenzi ukuze usukumele ngokushesha izinto ezenza babe banqika ukugoma.