Siyabadinga oMartin Luther, ziningi izimpisi emasontweni
MHLELI: Ngempelasonto bengisemngcwabeni kaNkk MN Dlamini (umaMthethwa) khona KwaMthethwa, eDondotha. Lo mama ubengumLuthela. UMfundisi Mthembu, wakhona eLuthela, ushumayele waqeqebula.
Ngibe sengikhumbula uMartin Luther, umsunguli webandla lamaLuthela. ULuther wayeliKhatholika ngokuzalwa. Wazalelwa edolobhaneni, Eisleben, eGermany.
Wayelwa nenkohlakalo nobugebengu obabenziwa yizikhulu zebandla ngokugebenga abazalwane umnikelo zisebenzisa igama likaNkulunkulu osekwenzeka emabandleni anamuhla njengoba nawo esethe chithi sakha izwe lonke. Ngo-1571 uLuther ubhale umqingo ephikisana nokukhokhwa kwemali ukuze kupheshwe isikwelethu sesikhulu sebandla u-Albrecht Branderburg ayesenze ebhange khona eGermany.
Wathi akube nenkulumompikiswano ngaphambi kokuba amakholwa akhokhe. Wabizelwa ekomkhulu lebandla eRome eyoshushiswa ngoba kucaca ukuthi kwase kunenhlansi yokungahambisani neRome eGermany, emuva komqingo ayewubhalile. Wacelwa ukuba awuhoxise lowo mbhalo, wenqaba.
Uveza ukungahambisani nokuba namandla apheleleyo nanokungabi nalo iphutha kukaPhapha. Wathi naye angawenza amaphutha ngoba uphila emhlabeni. Wabhala incwadi ethi On Papacy In Rome. Kule ncwadi ubuza ngesikhundla sikaPhapha ukuthi ngabe sigunyazwe nguNkulunkulu yini ukuba aphathe umhlaba wonke? Waphinda wabhala enye ethi To The Christian Nobility Of Germany Nation. Kuyona ubuza ukuthi kungani amakholwa angaziqokeli abefundisi, baqokwe yizikhulu eziphezulu zebandla.
Ziningi kakhulu izincwadi ezabhalwa wuLuther ezimelene nokugetshengwa kwabazalwane ebandleni. Wadabula nencwadi eyayivela kuPhapha imsabisa ngokuthi akahoxise imiqingo ayeyibhalile nezinkulumo ayezethula emakholweni "ngokungemthetho".
Waxoshwa ebandleni eliKhatholika wase esesungula elakhe ibandla, iLutheran Church, ngo-Okthoba 1521 namuhla eselaziwa ngamaLuthela. Namuhla eGermany kunemigwaqo, izitaladi, izitolo nenyuvesi okuqanjwe ngoLuther. Siyambonga uLuther ngokuba nesibindi nokwembula izingqondo zabantu ukuba "bangabanjwa" ukuthi okushiwo umgcotshwa kuyikho. Bayadingeka kakhulu oLuther banamuhla. Ikakhulukazi emabandleni akithi. Ziningi kakhulu izimpisi ezevathe izikhumba zezimvu. Angigcine ngokubonga noMfundisi Mvelase obephethe inkonzo.
Ubengagxeki bandla njengoba bake benze abanye abagcotshwa. Uthe naye wayekade evakashele ibandla okukhunyulwa kulo izicathulo, naye wazikhumula kwadunyiswa kwakuhle. Alale ngoxolo-ke nokaDingiswayo obengcwatshwa
Phila N. Mthethwa
EMPANGENI