Ake ababe nonembeza osopolitiki
MHLELI: Ngivumele ngisike elijikayo kwelakho eliwela umfula ugcwele. Sengathi kungahlale kunokhetho ukuze umphakathi uzibone ubalulekile njengoba unakwa kangaka uma kuzoba nokhetho. Osopolitiki basithanda wena owabona ingane ithanda uswidi okanye u-icecream.
Kunezinto ozibona zenzeka lapha eMzansi uze ucabange ukuthi uyaphupha. Kwesinye isikhathi ubone ukuthi osopolitiki bacabanga ukuthi thina bavoti siyiziphukuphuku. Baphumile impela bayakhankasa, basithembisa izinto obonayo ukuthi zingamampunge. Njengoba sibabona manje bekhankasa kuzofika ukhetho lwedlule kube sesibagcinile, sesoze sibabone ngokhetho oluzayo sebezosikhohlisa ngezijumbana zokudla.
Kuningi nje manje abakwenzela umphakathi ukuwuncenga ukuthi ubavotele. Kuyothi kungedlula ukhetho, bakhohlwe ukulethela umphakathi izidingo. Imibuzo ongazibuza yona ukuthi baqala manje yini, ngoba sekusondele ukhetho, ukubona ukuthi umphakathi udla imbuya ngothi? Kanti umphakathi ulamba kuphela uma sekusondele ukhetho yini? Lezi zijumbana zokudla umphakathi uzozidla kuze kube nini? Uma seziphelile kuzokwenzekani?
Indlela omasipala abasaphaza ngayo imali yabakhokhintela iyamangaza. Imali engabe ifeza izidingongqangi zomphakathi bona bakhankasa ngayo. Noma kunjalo, awukho umasipala osaphaza imali bebe besokola abanye babasebenzi bawo njengomasipala waKwaNongoma. Phela abasebenzi kulo masipala abaphathwa ngendlela efanayo. Kukhona abanye abangaconsi phansi bese kuba khona abashiphelwa yiqaqa.
Ngendlela abaphathi balo mkhandlu abasaphaza ngayo imali, ungathi bayabona vele ukuthi sekuphelile ngabo. Benzela ukuthi umkhandlu ozongena emva kokhetho ufice kungasekho ngisho indibilishi esikhwameni semali yomkhandlu. Ngiyawuzwela umkhandlu omusha ozongena ngoba usazo-ke ukhokhe izikweletu ezenziwa ngamabomu yilona ophethe manje.
Sengiphetha, ngifisa ukuthi kuvuseleleke onembeza kosopolitiki nabanye babaphathi bomasipala. Indlela abenza ngayo angikholwa ukuthi iyamthokozisa uNkulunkulu ohlezi ingunaphakade esihlalweni sobukhosi.
Sithembiso Sibisi KWANONGOMA