Ufisa ukuba yiNgqungqulu ngeziNtwezinhle emsakazweni
UBONGA umsakazi ongasekho, uThembinkosi Zwane, owayesakaza kwiJozi FM, uNgqungqulu Mchunu, othi wamsiza ngokungena endimeni yomsakazo ayezifela ngayo.
UNgqungqulu, odume ngelikaNtwezinhle, ungowokuzalwa KwesaKwaBiyela, eMpangeni, kanti ungumsakazi esiteshini somphakathi, iSounds of Azania, eseJeppestown, eGoli.
Kulo msakazo usakaza uhlelo oluthi Ezidlubhedu, olungena ngoMgqibelo, ngo-12 kuya ku-3 ntambama.
Lolu hlelo, olugxile kakhulu emculweni wesintu, uthe bakhethe ukulufaka ngalesi sikhathi njengoba umsakazo wabo usemncane, bengeke bakwazi ukuqhudelana nezinye iziteshi ezinkulu, izinhlelo ezifana nalo ezingena ngo-9 ekuseni.
“Ngenxa yokuthanda umculo wesintu futhi ngithanda nokusakaza, ngo-2005 ngathola ithuba lokuvolontiya emsakazweni, iJozi FM, eseSoweto, lapho ngangisiza khona uThembinkosi obaziwa ngelikaMangethe.
“Wanginika ithuba lokufunda izimemezelo zomshado, imemulo nayo yonke imicimbi yesintu ohlelweni. Akagcinanga ngalokho, uma kunomcimbi awuhlelile wayenginika ithuba lokuphatha uhlelo uma kusangena abaculi abangamavukane. Lokho kwangiqeqesha kakhulu ekwazini ukukhuluma esidlangalaleni nakubantu abaningi,” kusho uNgqungqulu.
Uthe ngo-2009 washiya kulo msakazo ngoba esehlale isikhathi eside, wenza imisebenzi ehlukene okubalwa kuyo nezikhangiso.
“Igama likaNtwezinhle ngalithola ngaleso sikhathi, ngilinikwa ngomunye wabaculi engahlangana nabo ngenza omunye umsebenzi, ngingasekho emsakazweni. Ngaqhubeka ngihlanganisa amaciko kumaskandi ezindaweni ezingamapaki, kube khona abantu abazobukela beqhakambisa umsebenzi wawo.
Ngangibuye ngibe nezingxoxo ezikhethekile nabo, singekho emsakazweni. Lokho kwakubanika ithuba lokuthi bangene emisakazweni yomphakathi bakhulume ngomsebenzi wabo njengoba ngangithumelela ozakwethu emisakazweni ehlukene emincane izinkulumo eziqoshiwe,” kuchaza yena.
Uthe ngo-2019 ube esethola ithuba kulo msakazo akuwona manje nokuyinto emjabulise kakhulu.
Ohlelweni alwenzayo uthe ufike lwenziwa nguSifiso Chiya, nathe babambisene kahle naye.
Uveze ukuthi usanda kusungula umcimbi wezindondo owaziwa ngeNkunzi Awards.
Uthe kulo mcimbi kuqokwa abaculi abasafufusa ukuze nabo babone bekufanele ukuhlonishwa.