USuthu lufuna ukuvuka ngeSuperSport kwiDiski
USIBONISO "Nini" Vilakazi, oqeqesha AmaZulu FC kwiDStv Diski Challenge, ubona kuntwela ezansi eqenjini lakhe elingakawini kule sizini.
AmaZulu angompetha bangesizini edlule bendebe iDStv Diski Rewired, bayiwine ngokunqoba iMamelodi Sundowns kowamanqamu. Nokho selokhu kuqale isizini ka-2021/2022, kubhimba uhlelo nakuba ebuyise iningi labadlali awine ngabo. AmaZulu atabalasa endaweni ka-15 kwi-log yeDiski emuva kwemidlalo eyisihlanu.
"Asiqalanga kahle isizini kodwa indlela esidlala ngayo ibukeka iyinhle. Indlela esiyihlelele ngayo le sizini sibheka ukuthi ayifani nedlule lapho bekudlalelwa indebe. Imidlalo ingu-30 ezodlalwa kulokhu. Imidlalo emithathu esehluliwe kuyona akukhona ukuthi amaqembu esidlale nawo abengaphezulu kwethu kodwa bekungenxa yamaphutha ethu," kuchaza uVilakazi.
"Indawo esikuyona kwi-log asiziqhenyi ngayo. Kufanele sisukume. Nakuba singaqalanga kahle isizini kodwa emdlalweni odlule sibhekene neTS Galaxy sidlale kahle. Sizitshelile ukuthi uma singawini, okungenani asithole iphuzu. Ukungaqali kahle sekuyazwela kubadlali ngoba singompetha bangesizini edlule."
Isifo esihlasele iqembu leDiski loSuthu, siyafana nesinyuse amaphaphu kwelidlala kwiDStv Premiership eliqeqeshwa nguBenni McCarthy, eliqale ngegiya eliphansi phezu kokuqeda endaweni yesibili kwi-log ngesizini edlule. Nokho elikaMcCarthy lzikhombise ukubhukula emidlalweni eliyidlale ngaphambi kwekhefu leFifa.
Abafana bakaVilakazi bazobhekana neSuperSport United eKing Zwelithini Stadium ngeSonto ngo-10 ekuseni.
"Kade ngikhuluma noBenni ngalokhu ukuthi abantu bazitshela ukuthi bazozihambela ngenxa yokwenza kahle ngesizini edlule. Amaqembu adlala nathi ayazimisela ngenxa yendlela esidlale ngayo ngesizini edlule. Kodwa ngincamela ukwehlulwa manje isaqala isizini.
Imiphumela ikhombisa ukuba ngcono manje. Emidlalweni ezayo AmaZulu azonyuka kwi-log. Ukwehlulwa kanje kubavusa emaqandeni abadlali. Sizodlala neSuperSport ngeSonto. Yiyona impelasonto esizoshintsha ngayo izinto lena. Bayazi ukuthi bazodlala nompetha, kufanele sibhukule," kusho uVilakazi.
Imidlalo yeDiski Challenge yangempelasonto:
NgoMgqibelo - Ngo-10am: Chippa United v Swallows (Wolfson Stadium); Lamontville Golden Arrows v Stellenbosch (Princess Magogo Stadium); Marumo Gallants v Maritzburg United (Old Peter Mokaba Stadium).
Ngo-12pm: Orlando Pirates v Baroka (Rand Stadium); Royal AM v Sekhukhune United (Mpumalanga Stadium).
NgeSonto - Ngo10am: Cape Town
City v Kaizer Chiefs (Molta Park Sports Complex); TS
Galaxy v Mamelodi Sundowns (Tsakane Stadium); AmaZulu v SuperSport United (King Zwelithini Stadium, 10am).