OweLions uthi kungasiza ukubuyiswa kwabalandeli
UMQEQESHI weHungry Lions, uHenry Basie, ukholwa wukuthi ukubuyiswa kwabalandeli ezinkundleni, kungasiza baqophe umlando wokwenyukela kwiDStv Premiership, yize bengomakoti kwiGladAfrica Championship.
Lo mqeqeshi utshele Isolezwe ukuthi njengoba besendaweni yokuqala kwiGladAfrica, likhulu ngendlela emangalisayo isasasa kubantu basesifundazweni sabo, iNorthern Cape.
Uthe lokhu kudalwa ukuthi sekuphele iminyaka ewu-16 bagcina ukuba neqembu elidlala kwiPremier Soccer League (PSL). Kwagcina ngeLouisvale Pirates eyayidlala kwiGladAfrika ngo-2004/05, isabizwa ngeMvela Golden League.
UBasie uthe nakuba bekujabulela ukwesekwa ngale ndlela kodwa kugcina sekuba nengcindezi.
Uveze ukuthi lapho behamba khona izakhamuzi zaseNorthern Cape, zibacela ukuthi banyusele iqembu kwiDStv Premiership.
"Sizama ngayo yonke indlela ukugwema le ngcindezi. Uma nje ngingakutshela iqiniso, thina sizihlelele ukuthi sisonge isizini sisemaqenjini ayisithupha aphezulu. Nakuba kunjalo ngeke ngiqambe amanga, kungasijabulisa kakhulu ukuba yiqembu lokuqala laseNorthern Cape ukudlala esigabeni esikhulu,“kusho uBasie.
ILions enesikwati sabadlali abawu-24, iqhwakele ngamaphuzu awu-13 emidlalweni eyisikhombisa. Isawuzwa ngendaba umpetshisi. Inqobe imidlalo emithathu, yadlala ngokulingana kwemine.
"Kusesekuseni, sizoqhubeka nokuqapha isimo. Sikholelwa ekutheni uma kungavunyelwa abalandeli ezinkundleni singathola umdlandla omkhulu. Sikholwa kulokhu ngoba abantu baseseka ngale ndlela phezu kokuba bengakaze basibone sidlala. Sinxusa abantu bakithi ukuthi bayogomela iCovid-19 ukuze bakwazi ukubuyela ezinkundleni, " kunxusa uBasie.
Nakuba ejabule ngesikwati sakhe lo mqeqeshi uthe bahlela ukusiqinisa uma kuvulwa iwindi lokuhwebelana ngabadlali.
NgeSonto ngo-3.30 ntambama, iLions izovakashela iTshakhuma, eThohoyandou Stadium, eLimpopo. ITshakhuma ebhaxabulwe yiRichards Bay ngo-4-0 kodlule, izoya kulo mdlalo nomqeqeshi omusha uZeca Marques ozolekelelwa uMulondo Sikhwivhilu.
I-TTM isendaweni ka-12 kwi-log ngamaphuzu ayisishiyagalombili.
UBasie uthe umdlalo ubaluleke kakhulu ngoba bafuna ukuvula igebe lamaphuzu kwiPlatinum City Rovers, ababambene nayo ngamaphuzu awu-13. Nayo iRovers yaseNorth West, iyafika kwiGladAfrica Championship.
Imidlalo yangempelasonto yeGladAfrica:
NgoMgqibelo - Ngo-3.30pm: Free State v Tuks (Globe Park); Leopards v JDR (Old Peter Mokaba); All Stars v Bay (Parow Park); Rovers v Cosmos (Profert Olen Park).
NgeSonto - Ngo-3.30pm: Sporting v Venda (Kabokweni); Callies v Spurs Lucas Masterpieces Moripe); Tshakhuma v Lions (Thohoyandou); Uthongathi v Polokwane (Princess Magogo).