Akukuhle ukuthi uthisha kube nguye ofundisa izingane ububhoklolo
YIZE kwavalwa eminyakeni engu-25 edlule ukusetshenziswa kwenduku ezikoleni kepha iNingizimu Afrika isenenkinga yokushaywa kwabafundi.
Baningi bakholwa wukuthi kunzima kwabanye othisha nabazali ukuhlukana nenduku ngoba iyona ndlela abayaziyo neyayisetshenziswa eminyakeni edlule, ukukhalima izingane. Akungeni ukuthi induku kayisekho emthethweni.
IKomiti lamaLungelo eziNgane kwi-United Nations, lichaza ukujeziswa ngokomzimba nganoma yisiphi isijeziso kusetshenziswa amandla futhi kuhloswe ukudala ubuhlungu, njengento engamukelekile ezikoleni.
Nakuleli, umgomo wokuziphatha kothisha uthi kumele bahloniphe ubizo lwabo ngokufundisa nokuqeqesha abafundi futhi bahloniphe amalungelo abo. Kuthiwa othisha kufanele bakuthathe njengomsebenzi wabo ukuqhakambisa amalungelo ayisisekelo, njengoba enjalo kuMthethosisekelo waseNingizimu Afrika.
Okunye okumqoka wukuthi othisha bamelwe wukugwema noma yiluphi uhlobo lokululaza, futhi bagweme noma yiluphi uhlobo lokuhlukumeza, ngokomzimba noma ngokwengqondo.
Iqiniso lithi abanye othisha kuyabehlula lokhu njengowaseVumokuhle Primary, eMlaza okuthiwa uyalele abafundi ukuthi bamjezisele omunye ngokumshaya ngoba kuthiwa umdelelile.
Kuthiwa uthisha wesifazane uvale umnyango wayalela ikilasi ukuthi lishaye umfundi, yena wahlala phansi wabukela. Kuthiwa umfundi ushaywe ngezimpama, wabhonywa, abanye bamthuhluza ngezincwadi.
Kuthiwa uthisha uthe akafuni ukuzibambela ngezakhe izandla ngoba usaba ukulahlekelwa wumsebenzi. Isenzo sikathisha sidinga ukugxekwa nxazonke ngoba ukuphaka impi, kuyicala. Ngale kwalokho, ufundisa izingane ububhoklolo nokuthi udlame luyisixazululo.
Nokho-ke siyathemba ukuthi uMnyango wezeMfundo uzobhekana naye ngendlela efanele ngoba akukuhle ukuboshwa kwawo ngenxa yesihluku sothisha kubafundi.