Sengathi zingebekhona izinkinga kolwabasizi bothisha
MHLELI: Kwelakho elizikhipha zisashisa, ngivumele ngibuze umbuzo kuNgqongqoshe wezeMfundo KwaZuluNatal, uMnuz Kwazi Mshengu, ukuthi akuzokuba khona zihibe yini ngodaba lwabasizi bothisha?
Lokhu ngikubuziswa ukuthi nyakenye kwaba khona ukukhala kwababeqashiwe ngokubambezeleka kokukhokhelwa kwabo.
Kwaba nezinsolo zokuthi izikole nothishomkhulu bazidlela yona le mali, futhi abanye bebanika engaphelele.
Besifisa ukuba kulokhu kungabi bikho ukukhala kwabantwana ngoba ngokwedlule wathi uMshengu bayaluqala lolu hlelo yingakho lunezihibe.
Yize abantwana bejabulela ikota yesinkwa kunokungatholi lutho kodwa kusekhona ukukhala ngokungafuni ukuqasha kukahulumeni wethu esifundazweni sethu, iKZN. Selokhu kungene le nsizwa yakwaMshengu ezintanjeni, kunokungahleleki kwezinto ekuqashweni kothisha.
Kuke kwaba nokukhala kokuthi ungase udilize uMnyango wezeMfundo ngenxa yokwehliswa kwesabelomali kuwona. Lapho kwasiza izinyunyana zothisha, iSadtu neNatu, zayilwa le mpi yokudilizwa kothisha. Yize bayiwina kodwa kusenokukhala kokuthi izinyunyana zihlulwa yini ukulungisa inkinga yokungaqashwa kothisha esifundazweni.
Angethembe ukuthi uMshengu nethimba lakhe bazongasigili njengokwedlule, lapho baholela izingane sekudlule isikhathi. Angethembe futhi bafundile emaphutheni abawenze ngokwedlule.
Ngibafisela inhlanhla abazonikwa ithuba lokuba ngabasizi bothisha futhi sibadinga behlomulile kakhulu kulo mkhakha wezemfundo.
Bese ngibaluleka ngokuthi abayeke ukushaya izingane ngoba bese kunokukhala okukhulu kubazali ekutheni izingane bazishaya ukwedlula othisha bangempela. Bona okumele bakwenze ukusiza izingane lapho zisala khona ngoba bangabantwana bendawo.
Khabzela KB Mzimela
EZWELIBOMVU