Kubhekwe oweJVW neCeltic kwiSuper League
IZOBE ibheke ukubuyela emgqeni embangweni weHollywoodbets Super League iJVW FC uma isitholene phezulu neBloemfontein Celtic Ladies eTsakane Stadium kusasa ntambama ngo-3.
Leli qembu lihlulwe yi-UWC ngo-3-1 ngoLwesithathu ntambama kanti selidlale imidlalo emibili lingayazi iwini. Lilele endaweni yesine kwi-log ngamaphuzu angu-33 ngemuva kwemidlalo engu-17.
ICeltic isendaweni yesithupha ngamaphuzu angu-29 emidlaweni engu-19. Isinqobe imidlalo emibili ilandelana, idla iCoal City Wizards neMa-Indies Ladies.
IMamelodi Sundowns isazihambela yodwa kulandela ukubhaxabula iTsunami Queens ngo-7-0 ngoLwesithathu.
Umqeqeshi weSundowns, uJerry Tshabalala, uthe yize ubelindele amanye amagoli esiwombeni sokuqala kodwa ujabule ngamaphuzu amathathu. Ezakhe ziye ekhefini zihamba phambili ngo-6-0.
Kusasa bazodlala neFirst Touch eSeshego Stadium.
"Okumqoka ukuthi sibuye namaphuzu amathathu futhi sizoqhubeka sisebenze kanzima. Bengibaphumuzile abadlali abaningi ngoba kumele sibanakekele ngaphambi kokuthi siyodlala kwiCaf Champions League.
"Angingabazi ukuthi njengoba siya eSeshego sizodlala kangcono ngoba ngiyazi ukuthi abadlali bami bazokwazi ukulikhuphula izinga,“kusho uTshabalala.
IDurban Ladies iphinde yabuya nephuzu ngoLwesithathu ibambana ne-University of Johannesburg ngo-2-2. Besekungokwesibili leli qembu libhakuzisa inethi ngemuva kwesomiso semidlalo emihlanu.
Leli qembu laseThekwini kuzomele liphinde lisebenze kanzima uma selibhekene neRichmond United eChatsworth Stadium ngeSonto ntambama. IRichmond isanda kubhaxabula iGolden Ladies ngo-4-0.
Imidlalo yeHollywoodbets Super League yangempelasonto:
Kusasa - Ngo-3pm- JVW v Bloemfontein Celtic Ladies (Tsakane Stadium); Golden Ladies v Ma-Indies Ladies (Montshioa Stadium); First Touch v Mamelodi Sundowns Ladies (Seshego Stadium); Coal City Wizards v Thunderbirds Ladies (Puma Stadium); UWC v Tsunami Queens (UWC Stadium); UJ v TUT (UJ Stadium).
NgeSonto - 3pm: Durban Ladies v Richmond United (Chatsworth Stadium).