Bazimisele ukusebenza bobabili uSun-El noMsaki

ABACULI bakuleli, uSun-El Musician noMsaki bathi basazoqhubeka nokusebenza ndawonye, banike abathandi bomculo ukudla kwendlebe njengoba ziningi izingoma asebeziqophile, abangazi noma bazikhiphe zibe yi-EP noma i-albhamu ngoba banomsebenzi omningi.

Baqale ukusebenzisana engomeni kaSun-El ethi Ubomi Abumanga, abathi yenze kahle impela kunento ababeyilindele.

Bekhuluma neSolezwe uSun-El uthe uMsaki yintokazi enekhono uma ulalele umculo wayo. Uthe lokho kwamenza wabona ukuthi bangasebenzisana ezingomeni eziningi.

“Ingoma ethi Ubomi Abumanga sayenza sidlala, sifuna ukubona ukuthi abantu bazowuthakasela kanjani umculo wethu sisobabili. Namanje ngendlela eyenza kahle ngayo sihamba izindawo ezehlukene abantu besifuna sobabili, ukuthi sizobajabulisa ngayo.

“Ngakho ukubona ukuthi konke kusihambela kahle emculweni, ngikhethe khona ukuthi sivele siqhubeke senze nezinye izingoma, uma sengiqede ukusebenza i-albhamu kaSimmy, okuyiyona engimatasa ngayo manje,” kusho uSun-El.

Uthe ingcindezi eqhamuka kubantu ikhona, yingakho bechitha isikhathi esiningi besebenza bobabili estudiyo.

UMsaki uthe uyamhlonipha uSun-El, amchaze ngokuthi unguphrojusa olalelayo futhi okwaziyo ukusebenza ngaphandle kwezinkinga nempakamo.

Uthe yize esengene emculweni odansisa abantu kodwa ujabule ngoba usacula ngendlela yakhe akashintshile lutho.

Laba bakhuluma kanjena nje bazobe bengabanye babaculi abaphambili emcimbini waphesheya kwezilwandle, iBudXLab, ezoba seGoli. Kuzonandisa kuwona abaculi okukhona kubo uSebastian Dutch noMpho Wav.