UMthethwa usebiza iKaya FM ngeKhaya elisha
UBUYELA ekusakazeni umculi wowokholo waseThekwini, uKhaya Mthethwa, osejoyine iKaya FM yaseGoli.
UKhaya, oke wasakaza kwiMetro FM phambilini, uzokwethula uhlelo, iNoted, ngo-9 ekuseni kuya ku-12 emini ngoMgqibelo.
Lo msakazi akuyena yedwa ojoyina iKaya FM. Phambilini kuqinisekisiwe ukuthi uDineo Ranaka, olaxaze iMetro FM, ungomunye wabasha. Uzokwethula uhlelo lwasekuseni phakathi nesonto kusuka namhlanje noSol Phenduka owethula uhlelo, iPodcast and Chill, noMacG kuYouTube.
ISABC isikuqinisekisile ukuthi isikhala sikaDineo ohlelweni, iThe Bridge, ngo-9 kuya ku-12 emini, sizovalwa nguSabelo “DJ Sabby” Mtshali.
USabby uzoqhubeka nokwethula uhlelo lwakhe, iMetro FM Top 30, ngoMgqibelo ngo-9 kuya ku-12.
“Eminyakeni engu-32 uDJ Sabby usezuze okuningi abaningi abaphupha ukukuzuza futhi njengoba eneminyaka eminingi emlindile, yena nesiteshi bajabule ngokuthi indlela ibheke kuphi,” kusho umphathi weMetro FM, uKina Nhlengethwa.
Owayengumsakazi weMetro FM, uThomas Msengana, nosomahlaya, uSkhumba Hlophe, abebengena ekuseni, sebefakwe ebusuku. Laba bobabili bazokwenza uhlelo, iLast Call, ngo-10 kuya ku-12 ebusuku ngoMsombuluko kuya kuLwesine kuthi ngoLwesihlanu baqale ngo-9 kuya ku-12 ebusuku.
Izithandani eziphinde zeluleke ngobudlelwano, uMo noPhindi Grootboom, ziqashelwe ukwethula uhlelo, iThe Family, ngo-9 kuya ku-12 emini ngeSonto.
UMphathi weKaya FM oke waphatha iMetro, uSibongile Mtyali, uthe lezi zinguquko zikhombisa ukuthi kule minyaka engu-25, isiteshi esaqala ngayo, siyakwazi ukumelana nezidingo zabalaleli zokwethula izinhlelo eziseqophelweni.
“Ukwengezwa kwabantu abafana noDineo, Sol Phenduka, Khaya Mthethwa noMo noPhindi nokuhlela kabusha kwabanye bethu, kuyigxathu elimqoka iKaya 959 elilithathayo ukukhulisa isiteshi,” kusho uSibongile.