Usenkingeni oshaye isidudla ngemoto kamasipala
UYAFUNGA uyagomela uMasipala waseMsunduzi ukuthi uzowukhomba umuzi onotshwala umsebenzi wawo oxebule isidudla ngemoto yomkhandlu.
Okhulumela umasipala, uNkk Ntobe Mkhize, uthe sebeqale uhlelo lokumqondisa ubugwegwe umsebenzi womkhandlu othinteka kulesi sigameko.
Ukusho lokhu emva kokusabalala kwe-video ezinkundleni zokuxhumana, ekhombisa imoto enamagama omkhandlu ixebula isidudla.
Kule video kuzwakala abantu behlohla umshayeli wemoto bethi “akayishaye”.
Ivideo ithathwe ebusuku, kanti kusolwa ukuthi isigameko senzeke ngempelasonto.
Yize kukhala amakhwela ngesikhathi umshayeli wemoto “egugisa ithayi”, kunezwi lowesilisa ozwakala ekhala ngalesi senzo.
“Bafowethu izimoto zakomasipala badlala ngazo kanje abasebenzi bakhona. UMsunduzi, bese uthini? Imali kahulumeni,” kukhala owesilisa.
UNkk Mkhize uthe bona njengomkhandlu abahambisani nesigameko.
“Siyasigxeka ngazo zonke izindlela lesi sigameko. Sesiqale uphenyo futhi zikhona nezinyathelo zokuqondisa ubugwegwe esesizithathile silandela isivumelwano sokuziphatha esisayinwa abasebenzi bomkhandlu.
“Umkhandlu ngeke unanaze ekujeziseni abasebenzi abaganga ngempahla kahulumeni. Lesi senzo siphambene nesivumelwano sokuziphatha futhi sifaka umasipala ehlazweni.
UNkk Mkhize uthe baphenya nokuthi ngabe lo msebenzi wayenalo yini igunya lokushayela imoto ngelanga lesigameko.
“Isigameko senzeke ngempelasonto. Yebo bakhona abasebenzi bomkhandlu abasebenze ngempelasonto. Kungenzeka ukuthi wayesebenza, ingakho ayehamba ngemoto yomkhandlu ngempelasonto. Uphenyo ilona oluzocacisa kahle.”
UNkk Mkhize uncome ilungu lomphakathi elithwebule i-video, wathi isenzo salo sikhombise ukukhathalela impahla kamasipala.
“Umasipala uwashayela ihlombe amalungu omphakathi abike ngalesi sigameko. Ukubika ngaso kuzokwenza ukuthi umasipala uthathele abathintekayo izinyathelo, nokuzonciphisa izigameko ezifana nalezi. Amalungu omphakathi akumele athule, abukele kudlalwa ngempahla yomkhandlu. Phela impahla yomkhandlu yimpahla yawo umphakathi. Ngaphandle kwempahla umasipala ngeke ukwazi ukuhambisa kahle izidingo.”
Abantu ezinkundleni zokuxhumana bebehlukene phakathi ngalesi sigameko.
Bekukhona abebegxeka isenzo besibiza ngokuxhashazwa kwempahla kamasipala.
Bathe abasebenzi bomasipala abafana nalo oshaya isidudla ngemoto yomkhandlu yibona abenza ukuthi omasipala bahluleke ukuhambisa izidingo. Bathe umasipala unezinkinga eziningi kakhulu ezifana nokungcola kwedolobha, bathi abasebenzi bakhona kufanele bagxile ekulungiseni lezi zinkinga.
Abanye bavele bayiphendula ihlaya yonke le nto.
Bebesho nokusho ukuthi isenzo somshayeli sikhombisa ukuthi idolobha uMgungundlovu “lehlule”.
Abanye baze bathi uMgungundlovu kufanele “ukhishwe ibhodwe” lawo ngoba abantu bakhona abalawuleki.