Amaphoyisa azoqinisa isandla ngempelasonto
AMAPHOYISA kaMasipala weTheku azobe ekanise edolobheni lonke ukuqinisekisa ukuthi imithetho iyalandelwa njengoba kulindeleke izinkumbi zabantu edolobheni ngempelasonto.
Lokhu kuvezwe ngokhulumela amaphoyisa kaMasipala weTheku, uSuperintendent Boysie Zungu, othe bazobe bephume ngezinkani njengoba kulindeleke ukuthi kuphithizele kwazise kusasa kunomcimbi omkhulukazi, iHollywoodbets Durban July.
“Sizobe sigcwele iTheku lonke. Izinhlelo sinazo zokuqinisekisa ezokuphepha. Sizobe sikuzo zonke izindawo njengasemabhishi, eGreyville lapho kuzobe kuneDurban July khona nakuFlorida Road. Sizokwandisa isibalo samaphoyisa futhi sibe nezivimbamgwaqo ezindaweni esingeke sisho ukuthi yiziphi,” kusho uZungu.
Uthe njengoba emabhishi kungavumelekile ukuthi kubhukudwe ngenxa yegciwane i-E-Coli, abazophula umthetho bazojeza.
“Sizokwenza isiqiniseko sokuthi yonke imithetho yedolobha iyalandelwa ngoba abazoyiphula bazokhalelwa ngamasongo kaSigonyela njengachama noma yikuphi. Izinyathelo zizothathwa kwababhukuda ngenkani ngoba akuvumelekile,” kuchaza uZungu.
Uthe abashayeli kumele bayilandele imithetho yemigwaqo futhi bahloniphe nemiyalelo.
“Kuzoba namabhodi ashoyo ukuthi akupakwa endaweni ethize. Uma upake lapho, imoto izothathwa,” kusho uZungu.
Okhulumela amaphoyisa eSAPS KwaZulu-Natal, uConstable Thenjiswa Ngcobo, uthe bazosebenza nabahleli bomcimbi ukwenza isiqiniseko sokuthi abukho ubugebengu.
“Kuzotshalwa amaphoyisa enkundleni nangaphandle ukugwema ubugebengu.
“Sinxusa abantu ukuthi baqaphele futhi babike okusolisayo kwabezokuphepha abazobe betshaliwe,” kusho uConts Ngcobo.
UMnyango wezokuThutha KwaZulu-Natal, unxuse ukuthi abashayeli bashayele ngokucophelela.
“Kuyaziwa ukuthi ngalesi sikhathi siyanda isibalo sabasebenzisa imigwaqo emikhulu ehlanganisa uN2 noN3 ukuya eThekwini. Kuba yizivakashi ezivela ezifundazweni ezingomakhelwane nakwezinye izindawo esifundazweni. Abashayeli bayaxwayiswa ukuthi baqaphele ngoba imigwaqo eminingi ilinyazwe yizikhukhula zakamuva nokwenza kube nesiminyaminya nokubambezeleka.
“Kweminye imigwaqo kuncishiswe imizila futhi kweminye sekunemigodi ngenxa yemvula. Kuyakhiwa futhi njengengxenye yohlelo lukahulumeni.”
Uhulumeni wesifundazwe ubambisene neSouth African
National Road Agency, baqhamuke nohlelo lokumelana nesimo ukugwema izingozi ezenzeka kuN3 ngakuPeter Brown ezihlanganisa amaloli amakhulu.
“Uhlelo luhlanganisa ukufakwa kwamakhamera ukubheka isiminyaminya, ukutshala amaphoyisa ukuthi asize nokuthi wonke amaloli amakhulu ame, nokufaka amarobhothi nobuchwepheshe ukulawula izimoto.”
Umnyango uthe ucele namanye amaphoyisa eRoad Traffic Management Corporation futhi uzobe ubhekene ngqo nabashayela bephuzile, abashayela ngesivinini esiphezulu nabangenazo izincwadi zokushayela.