Kugxekwa ukuphazanyiswa kwezivivinyo emanyuvesi
UNGQONGQOSHE weMfundo ePhakeme uDkt Blade Nzimande, usegxeke abaphazamisa ukubhalwa kwezivivinyo ezikhungweni zemfundo ngoba kukhona abasuke benganeme ngakho.
UNzimande uthe lokhu kubeka engcupheni ikusasa lezitshudeni ezisuke zifuna ukuthola iziqu ngaphandle kokuphazamiseka.
“Ngifuna ukuhlaba ikhwelo lokuthi kumele sizivikele izivivinyo ezikhungweni zemfundo. Akumele sisebenzise izivivinyo ukulwa izimpi noma uma kukhona esikufunayo. Kumele sigxeke nokuphazanyiswa kwemicimbi yokuthweswa kwezitshudeni iziqu,” kusho uNzimande.
Usho lokhu nje ezikhungweni eziningi kube neziteleka kwaphazamiseka imicimbi yokuthweswa kweziqu, kwezinye kwaphazamiseka izivivinyo njengoba kubhalwa.
Uthe intsha eningi efunda ezikhungweni zemfundo isuke ingeyokuqala emakhaya lapho ivela khona ukuthi kube nomuntu ofunda enyuvesi.
Ukhale nangokuphazamiseka kokusebenza ezikhungweni okubalwa i-UNISA, Central University of Technology
(CUT), Mangosuthu University of Technology (MUT), Vaal University of Technology (VUT) naseTshwane University of Technology (TUT).
“Ngiyazibheka izinkinga kulezi zikhungo. Maduzane ngizohlangana nomkhandlu wenyuvesi i-Unisa ukubhunga ngezinto ezithinta nokungabikhona kozinzo, ukucekelwa phansi kwempahla. Abaphathi abaqhubeke nokusebenzisana nezinye izinhlaka ukuze kube nozinzo.”
Ubalule nokuthi uzoxhumana nomkhandlu waseMUT, ngezinkinga ezikhona kulesi sikhungo. Udalule nokuthi uzobuye ahlangane nemikhandlu yaseCUT naseVUT ukuze kulungiswe nezinkinga.
EMUT kushiswe izimoto kwacekelwa namanye amabhilidi kwenziwa yizitshudeni ebezikhala ngezinto eziningi ezithinta ukuphepha nokungaxhaswa kwabanye ozakwabo yiNSFAS.
Kumiswe izitshudeni kule nyuvesi kanti kusolwa nokuthi nezinye izitshudeni zaziyingxenye yalo mbhikisho.
Uthe kule nyanga uzohlangana nezinhlaka ezehlukene okubalwa inhlangano yemikhandlu yezitshudeni emanyuvesi i-SAUS, izinyunyana zabasebenzi nezinye izinhlaka ezikhungweni zemfundo ukuxazulula izinkinga ezikhona ezikhungweni.
“Uma sengiqeda ukuhlangana nezinhlangano zezitshudeni nabasebenzi, ngizohlangana nabaphathi bamanyuvesi kanjalo nabamakolishi. Kuyadingeka ukuthi sisebenzisane uma kunezinkinga zixazululwe ngokushesha kungaze kucekelwe phansi impahla.”