Ligwetshiwe iphoyisa elafuna ukugwazelwa
LIZOBHADLA ejele iphoyisa lomgwaqo elafuna ukugwazelwa ngezinkulungwane zamaRandi. UDumisani Mchunu (45), oyiphoyisa likaMasipala uMvoti, ulahlwe yicala lenkohlakalo wabe esegwetshwa yiNkantolo yesiFunda eMgungundlovana, ngoLwesibili.
Inkantolo imgwebe iminyaka emine.
UMchunu waboshwa ngasekuqaleni kwalo nyaka emva kokuba efune ukugwazelwa ngumnikazi wemoto ayeyivimbe emgwaqweni.
Ngokwesitatimende samaphoyisa, uMchunu kuthiwa washaqa imoto eyayinezinombolo zaseGauteng ngoba ethi amaphepha okubhaliswa kwayo akokoteliwe.
Kuthiwa wabe eseyalela umnikazi wemoto ukuba amgwazele ngoR10 000 ukuze ezodedela imoto lapho yayigcinwe khona, ephawundini likamasipala.
Okhulumela oKlebe KwaZulu-Natal, uCaptain Simphiwe Mhlongo, uthe umnikazi wemoto, owayengajabule ngesenzo sikaMchunu, wabe esebikela oKlebe wabacela ukuthi baphenye lolu daba.
“Udaba lwabe selusingathwa amaphoyisa alwa nenkohlakalo aqhamuka eThekwini. Emva kophenyo olunzulu, amaphoyisa abe esebopha uMchunu ngoMashi wakulo nyaka. Amthola elapho esebenzela khona, emahhovisi kamasipala. Wabe esethweswa icala lenkohlakalo.”
Emva kokuboshwa, uMchunu wadedelwa ngebheyili kaR1 000. UMhlongo uthe emva kokuvela kaningi enkantolo, uMchunu ugcine elahlwe yicala wabe eseyagwetshwa.
“Ugwetshwe iminyaka emine. Emibili yale minyaka uzoyidonsa engaphansi kweso loMnyango wezokuHlunyeleliswa kweziMilo.”
Udaba lukaMchunu luke lwasusa umsindo emva kokuvela kwezinsolo zokuthi waqhubeka nokusebenza emva kokudedelwa ngebheyili.
Imithombo yeSolezwe yaveza ukuthi uMchunu ubeqhubeka nokusebenza yize ebegqigqa enkantolo.
Umthombo waveza nokuthi uMchunu ubesefihliwe emehlweni abantu futhi engasawugqoki umfaniswano.
Kuthiwa ubesehlola izimoto ngaphakathi kwamasipala, engasaphumi.
Okhulumela umasipala, uNksz Phindile Phungula, uthe umasipala wammisa uMchunu emva kokuba ethweswe amacala.
“Sabe sesiqala uphenyo lwangaphakathi. Emva kwalokho uMchunu wabe esekhetha ukusula emsebenzini ngaphambi kokuthi udaba lwakhe lulalelwe.”