Uphume ngebheyili osolwa ngokudlwengula akhulelise umzukulu
UDEDELWE ngebheyili yiNkantolo yeMantshi yaseNtuzuma, umkhulu oneminyaka engu-75 osolwa ngokudlwengula nokukhulelisa umzukulu
(19) eNkantolo yeMantshi yaseNtuzuma izolo.
Ikhehla okuthiwa lingumfundisi laseNewtown A, eNanda, liphume ngebheyili ngemuva kokuthi ummeli (ongathandanga ukuthi igama lakhe lidalulwe) eveze ukuthi isimo sempilo yalo asisihle, ngakho kasimi ukuthi agcinwe ngaphakathi ngaphandle kobufakazi obuqinile.
Ummeli uphinde waveza incwadi athe isayinwe abahlali baseNanda abangu-30, besho ukuthi bayameseka umsolwa futhi abanayo inkinga uma eqhubeka nokuhlala kule ndawo uma ethola ibheyili.
Imantshi ibize umseshi ophethe icala uSeargent Wandile
Mkhize ukuzoqinisekisa isitatimende abesilethe enkantolo ephikisa ibheyili kamsolwa, edalule ukuthi umphakathi waseNewtown A uthi awumdingi umsolwa endaweni ngenxa yesenzo esibi okuthiwa usenze kumzukulu wakhe.
UMkhize uphinde waveza ukuthi umgilwa unezinyanga ezinhlanu ekhulelwe, nokuthi kulindeleke ukuthi enze ulibofuzo emuva kokubeletha ngoba ukulwenza ngalesi sikhathi kungaba yingozi.
Uphinde waqinisekisa ukuthi ikheli laseYellowood Park azoya kohlala kulona ummangalelwa uma ethola ibheyili, kuhlala khona indodakazi yakhe ethembise ukumamukela uma efika.
Umshushisi uNksz
Mbali Cele, uthe uphenyo aluphelele futhi abakwazi ukwamukela incwadi esayinwe umphakathi ngoba akukho okuqinisekisa ukuthi isayinwe amalungu omphakathi ngempela, futhi isimo sempilo kamsolwa singathola ukunakekelwa kunoma yisiphi isibhedlela, ngisho esagcinwe ngaphakathi.
Uqhube wathi ngeke kulunge ukuthi inkantolo ibeke phambili isimo sempilo yakhe bese ikhohlwa ukuhlukumezeka kukamgilwa, futhi azikho izinto azibekile phambi kwenkantolo eziveza ukuthi isimo sakhe siyaphuthuma.
Inkantolo ithe iyibhekile incwadi evela kudokotela elethwe umsolwa nokuthi unobudlelwano obuhle nomndeni aphinde abe umuntu obheke ikhaya ngemali yempesheni, yaveza ukuthi umgilwa ukhulelwe, okuzothatha isikhathi ukwenza ulibofuzo.
Iphinde yaveza ukuthi umsolwa waziletha esiteshini samaphoyisa ngenkathi ezwa ukuthi uyafuneka.
Uzobuye avele enkantolo efanayo ngoJulayi 18, nonyaka.