Yakhiwe ngendlela engafanele iNyobeni: Buffalo City
INDAWO yokucima ukoma, iNyobeni eseScenery Park, e-Eastern Cape, lapho okushone khona izingane ezingu-21 ngesonto, yakhiwe ngendlela engafanele. Nokulungiswa kwayo akuphasiswanga.
Lokho kuvezwe wuMasipala iBuffalo City ngoLwesithathu.
Okhulumela umasipala, uMnuz Samkelo Ngwenya, uthe abakaze bathole sicelo sokusebenzisa umhlaba okwakhiwe kuwo indawo yokucima ukoma.
Uphinde wathi abakaze basikhiphe isivumelwano sokuthi kwenziwe ibhizinisi lokucima ukoma kule ndawo.
Uveze nokuthi indawo le ayikaze yenze isicelo sokuthi akhushulwe amahora ehweba ngayo.
“Ayikho ipulani yokwakha esike sayithola, sayivumela. Ngokwamarekhodi ethu, asinayo ikhophi yesivumelwano sokwakhiwa kwesakhiwo ngoba sakhiwe ngokungekho emthethweni,” kusho uNgwenya.
Uthe indawo eyaziwa ngokuthi yi-ERF no 37300 eScenery Park, lapho kwakhiwe khona le ndawo yokucima ukoma, iyindawo yokuhlala abantu.
Unabe wathi inqubomgomo yomasipala ithi uma umnikazi wayo efuna ukuyishintsha ayenze ibe ngeyebhizinisi, kufanele bafake isicelo kumasipala.
Ezidunjini ezingu-21 zezingane ezishonile, esisodwa asikakhonjwa wumndeni. Kwenziwe isicelo sokuthi uma kukhona umndeni osekuphele izinsuku ungayiboni ingane yawo, uxhumane nabasemakhazeni kahulumeni.
Okhulumela amaphoyisa e-Eastern Cape, uBrigadier Tembinkosi Kinana ugcizelele ukuthi uphenyo mayelana nokwaholela ekutheni kufe izingane, alukaphothulwa.
“Njengoba besike sachaza phambilini, abaphenyi bophiko lwe-forensic basematasa nophenyo.
“Uma sebeqedile ngophenyo lwabo lwase-labaratory, kuzobe sekukhishwa isitatimende esichaza kabanzi ukuthi yini eyaba yimbangela yokufa kwezingane. Noma yini enye ekhulunywayo okwamanje, ayisilo iqiniso,” kusho uKinana.
UMgcinimabhuku we-ANCYL wesifunda, u-Aseza Somagaca, uthe umphakathi sekunezikhawu eziningi lapho uveza khona ukungenami kwawo ngendawo yesehlo yokucima ukoma, ngendlela umnikazi wayo avumela ngayo izingane ezingaphansi kweminyaka engu18 ukuthi ziphuze kuyo.
Uthe indawo isineminyaka yaqala ukudayisa utshwala kodwa uhlelo lokulungiswa kwayo lwenziwe ngonyaka odlule.
“Sikhale kakhulu ngayo. Saveza ukungenami kwethu ngezikhathi avala ngazo kanjalo nangokuphuza kwezingane ezincane,” kusho Somagaca.
Okhulumela iLiquor
Board e-Eastern Cape, uMnuz Mgwebi Msiya uthe ngesikhathi abanikwa ngaso imvume yokusebenza abendawo yokucima ukoma, yayihlangabezena nayo yonke imigomo yokuthola imvume.
“Kubukeka sebenze ushintsho ngaphandle kokusazisa siyibhodi,” kusho uMsiya.
Uthe indawo yokucima ukoma isivaliwe. Bazovula icala emaphoyiseni ngokudayiselwa utshwala kwezingane ezingaphansi kweminyaka engu18.
Kuzoba nenkonzo yomngcwabo ehlanganisiwe ngoLwesithathu, uma iphela, imindeni yelekelelwe ngosizo lwezokuthutha, ukuthi ithathe izidumbu iyobangcwaba lapho efisa khona.