Nqandani bo, nasi isihlava sokuntshontshwa kwezimoto sibhebhetheka
Ngithi angizwakalise ukudumala nokuphatheka kabi kwami ngalokhu engikubona kwenzeka lapha eMzansi, kokuntshontshwa kwezimoto.
Sekuyinsakavukela ukuntshontshwa kwezimoto nokushiya abanye bebulewe, abanye bethathelwe amaselula abo nemali. Lesi sihlava sibi futhi sikhula usuku nosuku.
Kuqala bekunohlobo lwezimoto olwaziwayo ukuthi yizona ezintshontsheka kalula kodwa muva nje lonke uhlobo seluyathathwa.
Kwesinye isikhathi izigebengu zingena emzini wabantu zifune izikhiye zemoto zishaye zichithe. Kwesinye isikhathi athi umnikazi ephuma nje nayo ukuyoyithenga imoto yakhe, ithathwe ngalo lolo suku. Kanti konakelephi bo? Bona-ke laba abafaka okokukhomba ukuthi imoto ihamba kuphi abanaso yini isandla kulokhu? Ngabe uma beqashwa kulezo zinkampani ezenza lo msebenzi bayabhekwa yini ukuthi abanawo umlando wokuba namacala obugebengu?
Okufike kwangikhathaza kakhulu kwakamuva nje yisigameko lapho umnikazi wemoto eyowasha imoto yakhe yohlobo oluphambili lakwaMercedes, okuthe uma eseyoyilanda kwathiwa kukhona oyikhokhelile bamnika ukhiye washaya wachitha nayo.
Lesi sigameko senzeke edolobheni laseMgungundlovu. Umbuzo uthi ngubani onecala lapho? Ngumnikazi wemoto ngokushiya imoto yakhe ngethemba lokuthi isezandleni eziphephile zabasebenza la kuwashwa khona izimoto noma ngabe kwabona abasebenzi bakhona sebesebenzisana nezigilamkhuba ukwenza lo msebenzi?
Uzothi omunye umnika kanjani umuntu ukhiye wemoto engalethwanga nguyena? Omunye athi baningi abantu awukwazi ukubanaka ukuthi nguyena kuyimuphi umnikazi wemoto.
Wena mphathi wendawo yokusebenza yiziphi izindlela ozenzayo ukuqinisekisa ukuthi imoto yomuntu iphephile? Abadayisa izimoto bona yikuphi abakwenzayo ukuqinisekisa ukuthi umuntu ozothenga imoto uphephile?
Kunalolu hlobo lwezimoto ezinkulu ezintshontshwa kakhulu kulesi sikhathi nokudume ukuthi ziweliswa emazweni angomakhelwane okubalwa iZimbabwe neMozambique.
Umbuzo enginawo ukuthi abakhiqizi bazo abanayo yini indlela yokuqinisa ezokuphepha kulezi zimoto ukuthi zingathatheki kalula? Bathule bathini zithathwa kalula kangaka? Ababoni yini ukuthi lokhu kuzobalahlekisela ngebhizinisi ngoba kuzokwehla ukuthengwa kwezimoto abazakhayo?
Sengiphetha nje, ngithi uhulumeni sengathi angabhukula kulolu daba.
Amaphoyisa abukeka eshaya ngonyawo lonwabu ukulwisana nalesi sihlava nokudala ukuthi uma abanikazi bezimoto sebezizijezisela abasolwa ngobusela, kuklewule wona futhi lo hulumeni athi abantu mabangakwenzi lokho.
Kwenziwenjani ngoba ngathi isandla sezokuphepha siyantengantenga? Asiqedwe lesi sihlava ngoba kuyonakala futhi kuya ngokuya konakala kakhulu.
Khumbulani Nene