Lukhulu luyeza ezweni ngenxa yenkohlakalo
MHLLEI: Uphenyo lwekhomishini yokugwamandwa kwamandla oMbuso kwezomnotho, lusafuna nolunye uphenyo olungeke lulethe ithemba ekutheni kuzozaleka amathokazi.
Okuletha ungabazane wukuthi kwakhona manje nangaso isikhathi ebekuqhubeka ngaso ikhomishini inkohlakalo beyivele isabhebhetheka. Asikakhohlwa wukuthi imali enguR500 billion bashaya bavala, ekubeni lwabe luqhubeka uphenyo lweKhomishini yeJaji uRaymond Zondo. Kwasayona iminikelo yezikhukhula sekuzwakele ukuthi amavondwe aqoba evungula. Zingakanani izindlu okwabe kungezoMbuso ezayekelwa abantu bazidlabhaza nezingaphansi kwePrasa nakwaTransnet esezingamahhoko kumanje. Kuwo wonke amadolobha kunezindlu zoMbuso esekwena utshani, esezisetshenziswa njengezidleke zemigulukudu yezigebengu namaphara.
Kwakhona kumanje indaba esematheni eyokonakalisa izakhiwo zakwaPrasa ojantshi bezitimela namakhebuli kagesi, okuze kubangele ukuphazamiseka kokuhamba kwezitimela nabantu abagcina sebefika emva kwesikhathi emsebenzini.
Ngikhuluma nje, kukhona izinqola zesitimela esithwala amalahle ukuwayisa eRichards Bay, ezaphuma kulayini kwasakazeka amalahle kusaqalwa unyaka odlule, ebangeni elilinganiselwa ku-10 kuya ku-15 wamakhilomitha ukusuka eVryheid. Abaphethe abacangi yini ukuthi amasela azogcina esezifaka ama-cutting torch maqede bayodayisela abamabhizinisi asebenza ngezinsimbi ezindala?
Yikhona lokhu ngithi ikhomishini eyaphenya ngenkohlakalo yakwaPrasa ngiyifanisa nengxenye yokuchitha imali yabakhokhintela entweni okogcina bengaboshwanga obhongoza benkohlakalo. Nkuzo izikhulu kuhulumeni inuka phu inkohlakakalo.
Lukhulu luyeza ezweni lethu. Lokhu okwenza abaculi baphesheya kwezilwandle bahlangana baqamba iculo ngobubha base-Ethiopia ngonyaka ka-1985, kuseyinto encane. Okwelethu izwe kuzokuba yinhlekelele engakaze ibonwe emhlabeni. Ophikayo kumele azibuze ukuthi ezwenikazi i-Afrika mangaki anogqam’cishi kagesi njengokwenzeka ezweni lethu.
Sipho Robert Mpungose
ESHOWE