U-Ertugral uzibona esengaletha ushintsho kwiPSL
UZOKHUZA ibuya kuleli ukuzofuna umsebenzi uMuhsin "Mshini" Ertugral owagcina ukusebenza kwiMaritzburg United ngo-2019.
Lo mqeqeshi, uthe okwamanje usaqashwe wusoseshini wangakubo eTurkey, iTurkish Football Association (TFA).
U-Ertugral, owafika kuleli ngeKaizer Chiefs ngo-2009, uthe usoseshini waseTurkey uthole ingqayizivele yethuba lokunikwa yiFifa umsebenzi wokuhlaziya konke ngeNdebe yoMhlaba, ezoba seQatar ngoNovemba.
Yilapho ebe esebizwa yiTFA ukuthi azosebenza phezu kokuthi yibimxoshile ngemuva kokuhluleka kweqembu ukuya kwiNdebe yoMhlaba. Ngaleso sikhathi wubeqashwe ukuba ngusomaqhinga.
Uthe inkontileka yakhe iphela uma kusongwa imidlalo yeNdebe yoMhlaba.
Uveze ukuthi uzizwa esenengekile wukuhlala eTurkey, uma kuphela iNdebe yoMhlaba uzoza kuleli ukuzofuna amatoho.
"Okokuqala, angibonge kwiTurkish Football Association ngokungethemba, baphinde banginike umsebenzi. Okungijabulisa kakhulu wukuthi ngizofunda lukhulu kulolu hlelo lweFifa,“u-Ertugral.
“Okuhle ngalo wukuthi luhlanganisa nokuthuthukiswa kwebhola emazweni ngamazwe.
Uma kuphela iNdebe yoMhlaba, ngizobuyela eNingizimu
Afrika eyikhaya lami lesibili. Ngeke ngande kakhulu kodwa akhona amaqembu ake angithinta. Kuyiko nje ukuthi imidlalo yomhlaba izoze iphele ngoDisemba. Ngalolu lwazi ngicabanga ukuthi lukhona ushintsho engizolwenza ebholeni laseNingizimu Afrika. Akesilinde sizobona ukuthi kwenzekani," kubeka u-Ertugral.
U-Ertugral waziwa ngokuba nenhliziyo encane. Ungomunye obe nenhlanhla yokuqeqesha zombili izinkunzi zaseSoweto. Ngo-2016, uke wathi qu kwiOrlando Pirates. Amanye amaqembu akuleli awacijile yiSantos, Ajax Cape Town neMpumalamga Black Aces.