Isapheka ithulula iGallants emelwe umqansa weConfederation Cup
KUSENGENZEKA izinguquko eziningi kwiMarumo Gallants kusukela manje kuze kube kuqala isizini entsha yeDStv Premiership.
Leli qembu belinomcimbi wokwethulwa kwabadlali abasha nomqeqeshi waseFrance omenyezelwe emasontweni edlule, uRomain “The Boss” Folz (31).
Emcimbini obuseSandton, eGoli ngoLwesithathu, iGallants iqinisekise ukufika kukaSam Nkomo, Koketso More noLesiba Nku bobathathu abebedlalela amaqembu asezigabeni zamaamesha ngokwehlukana.
IGallants imemezele kuwona lo mcimbi ukuthi isematasa emakethe nemizamo yokuthola abanye abadlali ezoqinisa ngabo kwazise ingelinye lamaqembu azomela iPremier Soccer League (PSL), kwiCaf Confederation Cup kulandela ukuzifaka kwayo kowamanqamu eNedbank Cup ngesizini ephelile.
Kwizethenjwa zangesizini edlule ngaphansi kukaDan “Dance” Malesela engavuselelwanga inkontileka yakhe, kusewuMiguel Timm, ojoyine i-Orlando Pirates, osashiye iGallants yize uCelimpilo “Zidane” Ngema noNdabayithethwa Ndlondlo, belokhu bemataniswa namanye amaqembu.
Kwethusile nokho ukukhonjwa indlela kukaMalesela kwazise kungaphansi kwesandla sakhe leli qembu lize lanakeka kubathandi bebhola baseNingizimu Afrika.
UFolz onoxhaxha lwezitifiketi zokuqeqesha e-Afrika nase-Europe, ubesebenza kwiTownship
Rollers FC yaseBotswana njengoba eseqhamuka kwiGallants.
Ngemuva kokwethulwa ngokusemthethweni kwabezindaba, uFolz uthe: “Wonke umfutho esizowufaka emsebenzini esizobe siwenza, ungenxa yentshisekelo yokujabulisa abalandeli.
“Ngizizwa ngihloniphekile ukuthi ngithole ithuba lokusebenza neqembu elikhulayo kwiligi ethathwa njengenye yamakhulu e-Afrika.”
IGallants iphinde yamemezela nokuthi isizoba neqembu labesifazane elizodlala kwiSasol League njengoba bekuseyiMamelodi Sundowns kuphela enalo kwawesilisa adlala esigabeni esikhulu sakuleli.
Ngaphandle kokungacaci ngokuzogcina kwenzekile ngoNgema noNdlondlo kodwa iGallants iveze ukuthi izocacisa maduze ngabadlali abaphelelwa yizinkontileka okukhona kubona uSiphelele “Stashi” Ntshangase, uqweqwe lukanozinti waseZimbabwe, uWashington Arubi noThabo Mnyamane ukubala abambalwa.