Lizoholwa uMkhalele eleBafana elizodlala kwiCosafa
LIZOHOLWA yiphini lomqeqeshi, uHelman Mkhalele, iqembu leBafana Bafana elizozama ukuvikela isicoco seHollywoodbets Cosafa Cup eThekwini, maphakathi nenyanga.
UMkhalele kwakufanele abambe izintambo kulo mqhudelwano nyakenye kodwa kwaphoqeleka ukuthi ahoxe ngemuva kokutholakala neCovid-19.
Izintambo zanikwa uMorena Ramorebuli, iBafana yagcine isidlile isicoco ngokuguqisa iSenegal kowamanqamu sekukhahlelwa amaphenathi.
Lo mqhudelwano uzoqala ngoLwesibili oluzayo, esigabeni samaqoqo. Njengelinye lamaqembu akleliswe phezulu ohlwini lweFifa uma kuqhathaniswa awesifunda seCosafa, iBafana izongena kumaquarterfinal. Kulapho izobhekana khona neMozambique, ePrincess Magogo Stadium, ngoJulayi 13.
Iqembu labadlali abangu-30, liqale ukuzilolonga eGoli, ngoLwesibili, kodwa bangu-23 kuphela abazolibangisa eThekwini, ngoJulayi 10.
UMkhalele ugculisekile ngendlela abadlali abazimisele ngayo njengoba beziqeqesha futhi ulindele ukuthi iqembu liqine ngokwanele.
“Ngijabule ngendlela esiqhube ngayo ngesikhathi siziqeqesha okokuqala. Ngigculisekile ngesimo sengqondo nendlela abaziphethe ngayo,” kusho uMkhalele.
“Umdlalo ngamunye esiwudlalayo njengeBafana Bafana, siwudlala ngenhloso yokuwunqoba. Sihlanganise leli qembu elinabadlali abancane, iningi labo linemiyaka engaphansi kuka23, ngenhloso yokwakhela ikusasa.
“Kunemidlalo yokuhlungela i-Afcon okumele siyilungele ezinyangeni ezimbalwa ezizayo kuphinde kube neyama-Olympic ka-2024, ngakho-ke kumele siqale silungiselele lokho, singalindi imidlalo ize ibe seduze kakhulu.”
IBafana Bafana isiyinqobe amahlandla amahlanu iCosafa Cup, ngo-1997, 1998, 2006, 2013 nango2019. Izwe elinezicoco eziningi yiZimbabwe, enezicoco eziyisithupha, kodwa engekho kulo nyaka njengoba isamiswe yiFifa.