Sebethi khumu abaphathiswa basesifundazweni
KUNABAPHATHISWA bakwazulu-natal abangeke babuyele ezikhundleni abaziphethe emva kokhetho oluzayo.
Sekuqinisekisiwe ukuthi umphathiswa wezokuthuthukiswa komphakathi, unkk Nonhlanhla Khoza, akabuyi kanti kunemibiko engaqinisekisiwe ethi nomphathiswa wezokuhlaliswa kwabantu, umnuz Sipho “KK” Nkosi, naye angeke abuye.
Izindaba zokuthi unkk Khoza ngeke abuye emva kokhetho ziqinisekiswe ubuholi BE-ANC Women’s League (ANCWL) Kwazulu-natal.
Unkk Khoza ubuye abe ngusihlalo walolu phiko esifundazweni.
Unobhala WE-ANCWL Kwazulu-natal, unkk Zama Sokhabase, uthe unkk Khoza ukubeke kwacaca ukuthi ngeke abuyele esikhundleni emva kokhetho.
Unkk Khoza waqokelwa kulesi sikhundla ngo-2019 ngaphambi kwalokho uke waba usihlalo wamakomiti ehlukene esishayamthetho sakwazulunatal.
Unkk Sokhabase uthe kuyabajabulisa ukwazi ukuthi unkk Khoza usazoqhubeka nokwenza umsebenzi WE-ANC yize engeke esabuyela esikhundleni abesiphethe kuhulumeni.
“Njengobuholi BE-ANCWL sizoqhubeka nokucela iziyalo kunkk Khoza njengoba sisembhidlangweni wokwenza impilo yabantu ibe ngcono.”
Kulo nyaka unkk Khoza ushonelwe ngumyeni wakhe, umnuz Jini Khoza, owayeyimeya kamasipala iharry Gwala.
Izindaba zokushiya kukankk Khoza zivela nje, bekusanda kuzwakala ukuthi ungqongqoshe ehhovisi likamengameli obhekelele ezithinta intsha, abesifazane nabakhubazekile, udkt Nkosazana Dlamini Zuma, ngeke abuyele esikhundleni emva kokhetho.
Ngeledlule kusabalale incwadi kadkt Dlamini Zuma lapho ebazisa khona ubuholi BE-ANC ukuthi ngeke esabuyela ephalamende.
Udkt Dlamini Zuma waqala ukuba yilungu lephalamende ngo-1994, ube ungqongqoshe weminyango ehlukene.
Unkk Sokhabase ukushayele ihlombe ukushiya kukadkt Dlamini Zuma.
Unkk Sokhabase uthe udkt Dlamini Zuma ubambe iqhaza ekulweleni amalungelo abesifazane.
“Sisebenzile kakhulu naye. Sizibonile izinguquko azenzile eminyangweni aqokelwe ukuba ayiphathe. Usebenze ngokuzikhandla ngaphansi kwabo bonke omengameli abakhethwe ngentando yabantu. Ungowesifazane wokuqala ukuba ahole i-african Union Commission.”
Isolezwe liphinde lahabula ukuthi unkosi ngeke abuyele esikhundleni.
Imithombo ekhulume nesolezwe ithe unkosi utshele ubuholi BE-ANC esifundazweni ukuthi ngeke esaqhubeka nokuba yilungu lesishayamthetho sakwazulu-natal emva kokhetho.
Unobhala WE-ANC Kwazulu-natal, umnuz
Bheki Mtolo, uvele wabhoka ngolaka ngesikhathi ebuzwa ngalolu daba.
“Angithi wena uthi kukhona abakuhlebelile lolu daba? Kungani pho usufuna ukufaka mina kule nto yakho? Uma ubethemba laba abakuhlebelile, kungani pho ungaqhubeki ubhale udaba lwakho? Mina ngizobiza isithangami nabezindaba ngesonto elizayo lapho ngizokhuluma khona ngezinto engizaziyo. Ngicela ningangifaki ezintweni engingahlangene nazo.”
Imizamo yokuthola ukuphawula kukankosi ayizange iphumelele njengoba zombili izingcingo zakhe bezingangeni.