Baboshwe emuva kweminyaka engu-38 ngelokubulala abomzabalazo

B

ABOSHWE sebengwevu ababengamaphoyisa obandlululo abasolwa ngokubulala isosha lomkhonto wesizwe, umnuz Jameson Ngoloyi Mngomezulu, owaphangalala ngo-1985. Omnuz Gerhardus Stephanus Schoon (82), Paul Jacobus van Dyk (76), Frederick Johannes Pienaar (77) nodouw Gerbrandt Willemse (63) bavele enkantolo yemantshi ophongolo. Abezokushushisa baqhuba umkhankaso wabo wokushushisa abantu ababegila imikhuba ngesikhathi sobandlululo. Amanye amacala asukela kulokho okwaphuma ngesikhathi sekhomishini yamaqiniso nokubuyisana. Ziningi izishoshovu zomzabalazo ezabulawa ngamaphoyisa obandlululo ezinye zigcine zingaziwa ukuthi zashonaphi ngoba namathambo azo engatholakali. Umngomezulu owayehlala oshabeni, engwavuma, aphinde abe nendawo yokuhlala eswatini, wayexinwe kabi amaphoyisa obandlululo esezithendeni zakhe. Kuvela ukuthi umngomezulu wayeyishoshovu SE-ANC esaziwayo nokwamdonsela amanzi ngomsele. Amaphoyisa obandlululo kuthiwa ayevame ukufika emzini wakhe apequlule yonke indawo. Ngojuni 1985 amaphoyisa obandlululo amlandela eswatini afike apequlula amthatha abuyela naye kuleli ngenkani ehamba emtitinya. Kusolwa wukuthi wahlukunyezwa kanzima eshaywa waze wafa. Isidumbu sakhe saqhunyiswa ngesiqhumane esodwana Bay. Umbuso uthe amadoda aboshiwe ayebambisene egila lo mkhuba futhi sekuyisikhathi sokuthi abhekane namacala awo. Umbuso uthe unobufakazi obukhomba amadoda aboshiwe futhi unethemba lokuthi uzowagojela enkantolo. Ngesikhathi abamangalelwa bevele enkantolo, upienaar nowillemse bebengekho. Ummeli kapienaar ubike ukuthi ikhasimende lakhe kaliphilile kahle wakhipha nencwadi ewubufakazi balokho kodwa uwillemse kwagcina kungavelanga ukuthi ukuphi. Kukhishwe izincwadi ezigunyaza ukuboshwa kwabo yase ilengiswa ekapienaar kodwa ekawillemse yagunyazwa ukuthi aboshwe. Icala lihlehlele u-ephreli 18, 2024 ukuze kulungiswe izindaba zokuthi abamangalelwa bathole abameli. Okhulumela abezokushushisa Kwazulu-natal, unkk Natasha Ramkisson-kara, uthe kunamalungiselelo okuthi icala lidlulele enkantolo enkulu. Kuwo lawo macala amadala avuke manje kusanda kugwetshwa omunye umlisa owabulala isishoshovu SE-ANC ethekwini naye uboshwe engasalindele lamlahla icala.