Zinobungozi izinkophe zokufakelwa ezingahlanzwa
SEKUJWAYELEKILE ukuthi abesifazane basebenzise izinto ezithile ukuvuselela ubuhle. Okuqaphelekayo wukuthi ezinye izinto ezisetshenziswayo zidala izinkinga esikhumbeni ngoba akuzona ezemvelo. Ukuziphaqula yize kuhamba phambili kodwa kunezinto zokufakelwa njengezinkophe kanti kukhona iningi labesifazane elingasakwazi ukuphila ngaphandle kwazo.
Yize izinkophe zizinhle futhi zenza owesifazane abukeke kahle esepheqa amehlo ngazo kodwa ongoti bathi zingadala umonakalo namagciwane emehlweni.
Ungoti kwezokuzicwala nesikhumba, unkk Futhi Mkhize, webuhle Beauty Academy uthe kunesikhathi esikalelwe izinkophe zokufakelwa okumele zisihlale.
Unkk Mkhize uthe uma kufika isikhathi sokuzihlanza nokuzikhipha, kumele nanjani kwenziwe lokhu.
"Noma ngabe yiziphi izingxenye zesikhumba zinendawo yokuphefumula, izinkophe zemvelo zifanelwe ukuhlala zihlanzekile nesikhumba emehlweni siphefumula.
“Uma sewuzifake amasonto elandelana kusho ukuthi sezigcwele izintuli, umjuluko nokungcola okungabonakali. Kuyaqala kwakhele izilwane ezincane eziyingozi emehlweni," kuchaza unkk Mkhize.
Eqhuba, uthe uma umuntu efake izinkophe ezibizwa ngama-individual, lashes ezithi azifane nezemvelo, kumele emuva kwamasonto amabili ziyohlanzwa kabusha. Lezi eziyibhande unkk Mkhize uthe zakhelwe ukuthi uzifake kanye emcimbini kepha ungangeni nazo embhedeni.
"Izindawo azifani ngenxa yokuthi abantu benza ibhizinisi. Kukhona abasebenzisa imikhiqizo engahloliwe, nokuyingozi. Iningi labantu liba nenkinga ngoba lifakwa izinkophe nge-glue yezinwele bese kuhlangana neziphaqulo kwakhele ukungcola okuphindiwe," kuxwayisa unkk Mkhize.
■ Ungabekezeli uma uzwa sengathi izinkophe ziyaxhopha, ziyaluma ziyashisa noma zivuvukele. Phuthuma kudokotela.
■ Uma ugeza musa ukubalekela ukuthi zithelwe amanzi ngoba kumele kukhucululeke ukungcola osekwakhele ezinkopheni zemvelo nezokufakelwa.
■ Ungalokothi uzidonse uzame ukuzikhipha izinkophe uma ungasazithandi ngoba ulimaza isikhumba, nezakho zemvelo.
■ Uma amehlo ekhombisa ukuba nenkinga ungasebenzisa amanzi bese uphuthuma kungoti wamehlo.
■ Ungavumi uma bekufaka ngenomfi yezinwele, akufanele nakancane ithintane namehlo, kudala umonakalo emehlweni.