Ijoka kubaqeqeshi lenza kufane nokuba konyokolume ebuntathelini
UMSEBENZI wobuntatheli muhle. Futhi mubi. Kusandidane-ke lokhu engikukhulumayo, ngingabhekise kuyena umfo kagcwensa - iqhawe likamaskandi eselaziphumulela.
Empeleni ebangeni eselihambekile sengibona kakhulu okungangichachambisi ngobuntatheli. Kodwa ngisakuthandela ukufa ukuloba. Sengiyixhwele. Sekwamila imizwezwe ngigida kule ndima. Sengingazonda, ngiqaleke kakhulu uma ngingazama ukuqhela kwezosiba.
Uma usujovekile yilo mkhakha wethu, kunelayisense oyizwa sengathi uyiphethe ekhulula umoya nxa ucoshela izindaba noma ubhala. Le phomethe kayichazeki nanokuthi ungathi uyisikelwe kuyiphi ishantshi. Ikwenza ufune ukwazi nezinto ezingakudingi wena. Kuba sengathi ngezakho lezi zindaba osuzilwela uze ubeke nempilo yakho engcupheni. Uziqhathe nebhizi, kwasho igenge yesimanje.
Umuzwa lona ngingawufanisa nowesishabasheki esilwela amalungelo abantu singathunywe muntu kodwa sihambe sihlomeka, sivusha size siphucuke udangala emadolweni.
Kokunye uzizwa uluphindlaphindla olunganeliseki, lungahlehli noma selutsheliwe ukuthi lapho oya khona alufakwa lubuya nodaka. Umvuzo wokuba yisiphiyoyo lona kuba ukuthi kla kwenhliziyo nxashana udaba lwakho seluthe ne emibhalweni, kuphawula ngalo abalufundile noma abaluzwile (kwabomsakazo).
Uma uphenya futhi ulandela udaba oluthile uvele ufane nekameli eliqhwashaza ogwadule lufuna isiphethu elingasazi noma sikhona. Emhlane waleli kameli kuthe chwa ingede obucabanga ukuthi ikuyisa esizalweni somfula kanti iyokufaka ezinyosini eziyokuthelekela usale umabokoboko.
Ngakolunye uhlangothi umsebenzi wokucoshela izindaba lona unakho nje okwenyelisayo ngawo. Shiya okwenkece, vele kayenelisi muntu.
Cha, khona akudliwa ziklongo lapha ebuntathelini. Uma ubuthaka ngokomoya, ungahlala wondile nasemzimbeni. Ukukhacwa nokuchashwa ngayo yonke inhlobo yesici kuyimpilo kulo msebenzi.
Uyazi kokunye abantu bakuhlambalaze uze ube luthuthwana ukuphoxeka. Ubuye uxoshwe nje ezintweni usathi usasho ukuthi ungubani wakwabani, Bakululaze abantu uhambe usubhancuzela, usindwe nayikhanda wena wabona ulamthuthu ubanjwe yinyukhasela. Ngiswele i-emoji yokucacisa lesi simo.
Eminyakeni engamashumi manti, ngake ngashushumbiswa ngomhlokolozo onzima wesibhakela ukhishwa umqaphi thizeni enkundleni yebhola ngoba ngizame ukungena ngingasivezanga isigqebhezana sokusebenza. Ngeke ngisalisho ibizo lale ndoda ngoba sagcina sesizwana, angisakhumbuli ukuthi sazwana kanjani ngoba, cha, yona yayinginyomfile.
Ngangithi ngisachaza ukuthi isigqebhezana lesi ngisishiye lapho bengihleli khona futhi ngedlule lapha kuye lo mfo ngiyochitha amanzi wangibona. Wavele wathi ngihomfa inkani. Wangabe esabuza, wakhipha omubi u-left lo, ezama ukungixhukulisa. Ngasheshe ngawubona, ngaqhiyama kuhle kukafloyd Mayweather. Isikhala sokugcwaca sasingekho, kunofefe emuva kwami. Imbokodo yesidladla salo mqaphi kayibange isafinyelela ngesantsha esiphelele kodwa ngezwa ukuthi iluqhwebile udebe ngasezindevini. Kwalekelela ukungenelela kwabanye bekhuza.
Ngezwa kumfoma umnsinsila kimi, uthi nsi nsi! Kwaveva iziqhoma kuthi angimukhe ngothufithi, kodwa ubuntatheli obukimi bathi cha awuzile ukuzolwa lapha.
Yimithwalo enjena-ke ebuye ibe semahlombe alo msebenzi wethu uvume ukungcofeka ngoba wemukela ukuthi izinkobe uzicosha ngosiba.
Kodwa-ke yize ubuntatheli businda bunjalo, ngicabanga ukuthi ukuba umqeqeshi webhola, ikakhulu eningizimu Afrika, kudinga abantu abanemihlane efana neyofudu. Futhi kube abantu abanokholo ekujuleni kwezinhliziyo zabo noma bengakaze bawufanise umbombo kamfundisi.
Ayiminingi imisebenzi lapho othi uqashwa ube wazi ukuthi uzothukwa, ngisho okumafinyilana kugcwanekele kuwe. Uxoshwe noma nini futhi. Kumele ukulindele nokujikijelwa ngezigujana uma abalandeli sebekusuthi.
Uyasebenza ngapha, kunezinye izinkulungwane zabaqeqeshi ezizama ukukutshela ukuthi yenzani. Nomphathi weqembu, ongakaze alibhubuze nangoqukulu ibhola, afune ukukubhozomela ngalokhu nalokhuya.
Ihleza liphathwa kangcono kunendlela abaphathwa ngayo abaqeqeshi bebhola likanobhutshuzwayo.
Le mpunga yasebelgium ehola lezi zakithi eziyozama inhlanhla e-ivory Coast, izosidinga isiguqo ngoba sesivele siyayinephuza thina balandeli. Futhi useze waba yingwedo nje uhugo Broos kufanele, ugazi nje yinto angakaze abe nayo. Unesigcwagcwa ngisho kubaqeqeshi bamaqembu E-PSL abalwaziyo usizi lokuba udomethe wayo yonke inhlobo yamansense. Kuyamsiza-ke ukuthi naye ubunjwe ngesikhumba seselesele emkhakheni wenkani. Abahhemela kuye usheshe abatshele kwezikabhoqo.
Ngihabazise-ke ngejoka lobuntatheli esethulweni somthemelezo wami namuhla. kodwa uma ngithi janti ngiqhathanisa nabaqeqeshi, ebuntathelini kuvele kube sengathi kukonyokolume.