Amaproteas amancane nethemba lokuvuka ngescotland kweyomhlaba
UNETHEMBA lokuthi iqembu lakhe lizovuka lizithathe emdlalweni wesithathu wamaqoqo endebe yomhlaba ka-under-19 ukaputeni weqembu lakuleli, ujuan James, yize linqotshiwe okokuqala kulo mqhudelwano ngolwesibili.
Amaproteas amancane aguqiswe yi-england ngama-run angu-34 emdlalweni kagroup B obusejb Marks Oval, epotchesfstroom.
Iqembu lakuleli belinqobe iwest Indies ngamarun angu-31 emdlalweni walo wokuqala, kanti i-england ibivule lo mqhudelwano ngokuhlula iscotland ngamawikhethi ayisikhombisa.
I-england iwine ithosi yakhetha ukushwiba kuqala. Amaproteas aqale kahle ukushaya usteve Stolk ethola ama-run angu-64 emabholeni angu55. Nakuba udavid Teeger ephume engashayanga neyokubika i-run kodwa bakhona abamesekile ustolk njengolhuan-dre Pretorius norichard Seletswane.
Udewan Marais obeshaya endaweni yesikhombisa udlale kahle naye ehlanganisa amarun angu-42 emabholeni angu-39, iqembu lakuleli lakhishwa lonke selihlanganise ama-run angu-230 kuma-over angu-49.2.
I-england ilahlekelwe yiwikhethi ka-jaydyn Denly esashaye i-run eyodwa kodwa abalandelile bebekhombisa ukungabezwa abashwibi bakuleli njengoba uben Mckinney eshaye ama-run angu-48 ngaphambi kokuthi akhishwe ngu Romashan Pillay, unoah Thain washaya angu-63.
Izivakashi bese zihlanganise ama-run angu-137, zisalahlekelwe amawikhethi amabili ngesikhathi imvula imisa umdlalo nge-over ka-39. I-england ibe isinqoba ngesinqumo seduckworthlewis ngenxa yokuthi ibiphambili kunesibalo sama-run ebidinga ukuba kusona.
“Izinkinga zethu ziqale ngesikhathi sesilahlekelwa yinqwaba yamawikhethi maphakathi ne-innings yethu. Abadlali bethu abaqalile ukushaya basibeke endaweni enhle kodwa saphinde sawulahla umgqigqo,” kusho ujames.
“Ngesikhathi sesishwiba sihlulekile ukusebenzisa ubungozi besivinini sebhola elisha, sangawathatha amawikhethi obekufanele siwathathe ukuze sizibeke ethubeni elihle lokunqoba. Yilokho engicabanga ukuthi sizenzela phansi ngakho.
“Ngicabanga ukuthi bekufanele sishaye amarun angu-40 noma angu-50 ngaphezu kwalawa esiwatholile. Ngokubona kwethu, befunalele sihlanganise angu-270 kuya ku-280. Ngakho-ke sonke sikholelwa ekutheni asiwashaya ama-run enele.”
Ujames uthe bazothatha izifundo abazifunde kulo mdlalo njengoba sebelungiselela owokugcina wamaqoqo lapho bezobhekana khona nescotland enkundleni efanayo ngomgqibelo ngo-10 ekuseni.
“Esikufundile wukuthi kufanele siqinisekise ukuthi siyawaqeda wonke amabhola ethu. Sizoqhubeka silwe njengoba besivele senza, nokuyinto engethemba ukuthi sizoqhubeka nayo kulo mqhudelwano,” kuqhuba ujames
“Ngiyethemba ukuthi sizovuka sizithathe emdlalweni olandelayo yize ungeke ube lula. Sifuna ukudlala kahle siqede isigaba samaqoqo ngegiya eliphezulu.”
Mathathu amaqembu azophuma eqoqweni ngalinye adlulele esigabeni sesibili samaqoqo esaziwa ngesuper Six, lapho ezohlanganiswa khona naqembu amathathu azoqhamuka kugroup C.
Kuzokwenzeka okufanayo nasemaqenjini amathathu azoqeda phezulu kugroup A, azohlanganiswa namathathu azoqhamuka kugroup D.
Amaqembu amabili azoqhwakela eqoqweni ngalinye lesuper Six azobe esedlulela kweyandulela owamanqamu.