Siyashuba isigcawu semantshi eqondisa ubugwegwe
SITHATHE elinye igxathu isigcawu sokuqondisa ubugwegwe umengameli wezimantshi Kwazulu-natal, omisiwe emsebenzini njengoba sekuvunyelwe izingqapheli ukuba zilalele okuzobe kwenzeka.
Inhlangano engenzi nzuzo, isaving The Wild, iveze ukuthi ingase ithathe izinyathelo zomthetho ekugcineni.
Ithe umsebenzi wayo wukuqapha nokuneka obala amahlazo athinta ubugebengu, ikakhulukazi bokubulawa kobhejane ngenhloso yokudayisa izimpondo zabo.
Emaphepheni ewathule kowengamele isigcawu, ijaji Jeremiah Shongwe eselathatha umhlalaphansi, inhlangano ifuna ukulalela konke okuzobe kushiwo, bese iyabona ukuthi ngeke yini yashushisa ekugcineni.
Ushongwe usivumile isicelo senhlangano emuva kokuthi siqale samukelwa wumqashi ngaphansi kwemagistrates
Commission nethimba elimele obekwe amacala, umnuz Eric Nzimande.
I-saving The Wild iveze ukuthi seyike yambika unzimande kowayengumvikeli womphakathi usolwazi Thuli Madonsela.
Icele ukungazithwali izindleko zabameli ngoba ithi ekwenzayo kuwukusiza umphakathi mahhala.
Unzimande uthweswe amacala angu-162. Uwaphike wonke ngomsombuluko kuqala isigcawu esisingathelwe enkantolo edingida amacala emindeni esephoyinti, ethekwini.
Ushongwe ube esekubekela umashi 4 kuya kumashi 15 ukulalelwa kwesigcawu.
Kwamanye amacala athweswe unzimande yizinsolo zokugwazisa abantu ayephakamise amagama abo kungqongqoshe ukuba abaqoke babe yizimantshi okwesikhashana.
Kukhona necala elimayelana nezinsolo zokuhlukumeza umsebenzi ngokocansi, elokushayelana ucingo nowayeboshelwe icala lokushushumbiswa kwabantu, amacala okuyogembula e-casino ngesikhathi somsebenzi.
Unzimande usolwa nangokuboleka imali kummeli ukuze akhokhele ingane yakhe enyuvesi.
Wamiswa emsebenzini ngo2018, uhlu lwamacala athweswe wona ngumqashi esebuyekeziwe lwalotshwa ngomashi 2021.
Unzimande uye abukeke ekhululekile uma evela phambi kwesigcawu nommeli.