Kuxwayiswa abantu nge-livestock Wealth
INHLANGANO elawula abasebenza ngemali kuleli, i-financial Sector Conduct Authority (FSCA) isiveze ukuthi inkampani esiza abatshala imali kwezemfuyo, i-livestock Wealth, kayinayo imvume yokwenza lo msebenzi.
I-FSCA ithe isithole ukuthi i-livestock Wealth yenza umsebenzi engagunyaziwe ukuwenza, wokunika abantu amacebo okutshala imali kwezolimo noma kwimfuyo.
Iveze ukuthi ayikaze igunyaze le nkampani ukwenza umsebenzi njengoba wonke amabhizinisi asebenza ngemali kufanele athole igunya nesitifiketi kulandelwa i-financial Advisory and Intermediary Services Act, ka 2002 (FAIS Act).
I-livestock Wealth isebenzisa inombolo yokusebenza yenye inkampani ebizwa nge-livestock FS ewufsp 51237.
Ithe iyayiphenya ne-livestock FS ngoba kufanele ichaze ukuthi inombolo yayo isetshenziswa kanjani ngenye inkampani ukuze ihwebe.
I-FSCA ithe izowazisa konke umphakathi uma isiqede konke ngophenyo lwayo kodwa yakugcizelela ukuthi i-livestock Wealth kayinalo igunya lokusebenza ngemali.
Kwisizindalwazi se-livestock Wealth, kubhalwe ukuthi abantu bangatshala imali ezinhlakeni ze-macadamia noma bathenge izinkomo nenye impahla yezolimo.
Abantu bakwazi ukutshala u-r2000 kuya ku-r18 730. Imali yabo ivuthwa ezinyangeni eziyisithupha kuya eminyakeni eyisithupha, kuya ngokuthi bayitshale kuphi.
Isolezwe libathintile abe-livestock Wealth, bacela ukuthi bathunyelwe i-email njengoba bezokhipha isitatimende ngalokhu.
I-FSCA ithe ngaphambi kokuthi abantu batshale imali yabo ezinkampanini ezithi zisebenza ngemali, kufanele babheke ukuthi zibhaliswe ngokusemthethweni, ngokushayela u-0800
110 443 noma babheke ku-www.fsca.co.za.