‘Uzuma waboshwa izibhelu kade zahlelwa’
ZIGQAMISE ukuxhuga kwezobunhloli eningizimu
Afrika nokucwasana ngokobuhlanga izinhlangano ezilwela amalungelo abantu kuleli, zethula imibiko yazo ngezibhelu zangojulayi 2021 emhlanga izolo.
Lezi zinhlangano, okuyisouth African Human
Rights Commission (SAHRC) ne-commission for the Promotion and Protection of the Rights of Cultural, Religious and Linguistic Communities, zichithe isikhathi esingaphezu kweminyaka emibili ziphenya ngezibhelu.
Zibe nezigcawu Kwazulunatal nasegauteng ngenhloso yokuthola kabanzi ngezibhelu ezinhlakeni ezehlukene.
Ukhomishana WESAHRC, unksz Philile Ntuli uthe umonakalo wabhebhethekiswa wukuthi kwakungekho ukuxhumana okuhle ezinhlakeni zobunhloli zikahulumeni kanjalo nokuzilungisela isimo.
“Uhulumeni waphuza ukuphendula nezinsizakusebenza zazinganele, okwaholela ekutheni isimo singalawuleki,” kusho unksz Ntuli.
Uthe umengameli, ongqongqoshe bezobunhloli namaphoyisa kwakufanele bakulungele ukuthi babhekane nenhlekelele eyabe isiphambi kwabo.
Uqhube wathi bathole ukuthi okwenzeka ngezibhelu kwakuhleliwe. Ubalule ukuvalwa komgwaqo u-n3, ukuhlaselwa kwamabhizinisi nokuqhunyiswa kwama-atm.
Uthe yize izibhelu zaqondana nokuboshwa kowayengumengameli wezwe umnuz Jacob Zuma, kwadwebeka isithombe sokuthi zenzeka ngenxa yalokho kodwa uphenyo lwabo luveza ukuthi akunjalo.
Uqhube wathi bathole ukuthi izibhelu zaqala ukuhlelwa ngodisemba 2020, lapho abathile babehlongoza khona ukususa uthuthuva emizameni yokususa umengameli Cyril Ramaphosa.
Uthe baphume nesincomo sokuthi kubekwe eqhulwini udaba lokucija amaphoyisa, ukuze akwazi ukukhuza ngendlela efanele uthuthuva emphakathini.
Ephawula ngokubulawa kwabansundu ephoenix, uthe kwabhebhezelwa yinzondo ebilokhu ikhona phakathi kwabomdabu basendiya nabamnyama.
“Sithole ukuthi ibilokhu ikhona inzondo ebilokhu ikhulunywa yizizukulwane ngezikulwane ngempi yango1949 ecato Manor neyango-1985 enanda,” kusho unksz Ntuli.
Usihlalo WECRL, usolwazi Luka Mosoma uthe abantu abenza izenzo zokucwasa ngokwebala kufanele bajeziswe.
“Kufanele izinhlaka ezahlukene emphakathini nakuhulumeni zisungule izinhlelo ezizogqugquzela ubumbano emphakathini wamandiya nowabansundu,” kusho umosoma.