Abe-livestock Wealth bachitha eyokuphula umthetho
AWUKHO umthetho abawuphulile abe-livestock Wealth ngokuhweba ngokusiza abantu ukuba batshale imali yabo kwezolimo.
Le nhlangano isho lokhu ngemuva kokuthi
Isolezwe libike ukuthi inhlangano elawula abasebenza ngemali kuleli, i-financial Sector Conduct Authority (FSCA) ithe, i-livestock Wealth, ayinayo imvume yokwenza lo msebenzi.
Ikhale ngokuthi i-livestock Wealth isebenzisa inombolo yokusebenza ngemali yenye inkampani ebizwa ngelivestock FS ewu-fsp 51237.
I-livestock Wealth ivumela abantu ukuthi batshale u-r2 000 kuya kur18 730 kanti imali yabo ivuthwa ezinyangeni eziyisithupha kuya eminyakeni eyisithupha, kuya ngokuthi bayitshale kuphi.
Esitatimendeni esithunyelwe kwisolezwe, isikhulu esiphezulu se-livestock Wealth, umnuz Ntuthuko Shezi, sithe ngo-2015 I-FSCA yabatshela ukuthi abayidingi ilayisensi ukuze badayise imikhiqizo yezolimo.
Uthe bashaqekile ngesitatimende SE-FSCA ngoba bona bazi ukuthi awukho umthetho abawuphulayo ngomsebenzi abawenzayo.
"Sizosebenzisana NE-FSCA ophenyweni lwayo.
“Awukho umthetho esiwuphulile futhi sinalo ilungelo lokusiza abafuna ukutshala imali emikhiqizweni yezolimo. Sinezinkampani ezimbili okuyi-livestock Wealth Pty LTD Technology edayisa imikhiqizo yezolimo eyaqala ukusebenza ngo-2015.
“Inkampani yesibili yi-livestock Wealth Financial Services eyavulwa ngo-2020 ukunika abalimi esisebenzisana nabo umshwalense. Yathola isitifiketi sokusebenza ngemali ngo-2021," kusho ushezi.
Uthe zombili lezi zinkampani zibizwa ngolivestock Wealth yize enye isungulwe ngo-2015 enye iqalwe ngo-2020.
Ukugcizelele ukuthi awukho umthetho abawuphulayo kukho konke abakwenzayo.